महाविकास आघाडीचे सर्व निर्णय शहरातील शेवटच्या नागरिकांपर्यंत पोचवा
: राष्ट्रवादीच्या कार्यकर्त्यांना अजित पवारांचे आवाहन
पुणे : “सरकार म्हणून नागरिकांचे प्रश्न सोडवण्यास महाविकास आघाडी कटिबद्ध आहे. पुणे शहरात राष्ट्रवादी काँग्रेस पार्टीच्या प्रत्येक कार्यकर्त्याने स्वतःला झोकून देत पुणेकरांच्या सेवेत उतरावे व महाविकास आघाडीचे सर्व निर्णय पुणे शहरातील शेवटच्या नागरिकांपर्यंत पोचवण्याचा काम माझ्या राष्ट्रवादी काँग्रेस पार्टीच्या कार्यकर्त्यांनी करावे”. असे आवाहन राष्ट्रवादीचे वरिष्ठ नेते आणि उपमुख्यमंत्री अजित पवार यांनी केले.
राष्ट्रवादी काँग्रेस पार्टी हा असंख्य कार्यकर्त्यांचा परिवार आहे. परिवारातील सर्व सदस्यांसोबत संवाद साधण्यासाठी “संवाद कार्यकर्त्यांशी, पक्षाच्या केंद्रबिंदूशी” या संकल्पनेसह राष्ट्रवादी काँग्रेस पार्टीचे महाराष्ट्र प्रदेशाध्यक्ष जयंत पाटील यांच्या नेतृत्वात ‘राष्ट्रवादी परिवार संवाद” हा उपक्रम राबवण्यात येत आहे. या संवाद यात्रेचे आज पुणे शहरात आगमन झाले.सौ. सुप्रियाताई सुळे, महिला प्रदेशध्यक्षा रुपाली चाकणकर, युवक प्रदेशाध्यक्ष मेहबूब शेख, सुनील गव्हाणे यांच्या प्रमुख उपस्थितीत कर्वेनगर येथील दुधाने लॉन्स येथे शिवाजीनगर,कोथरूड,कसबा व खडकवासला या चारही विधानसभा मतदारसंघाची आढावा बैठक घेण्यात आली. याअंतर्गत सर्व फ्रंटल सेलच्या अध्यक्षांनी कार्यकर्त्यांशी संवाद साधला.
गेल्या २०१९ च्या निवडणुकीमध्ये या चार विधानसभेपैकी खडकवासला विधानसभा मतदारसंघात आपण सर्वांनी पक्ष संघटना बूथ कमिटी यावर एकसंधपणे काम केले. त्याचा परिणाम म्हणून खडकवासला विधानसभा मतदासंघांत आपण थोड्या फरकाने आपल्या सहकार्‍यांना अपयश आले. मतदार यादी व बूथ कमिटी हे या सर्व संघटनात्मक बांधणीचा पाया असून, संपूर्ण पक्ष संघटना ही या पायावर मजबूतपणे उभी आहे. हा पाया अधिकाधिक भक्कमपणे मजबूत केल्यास येत्या महानगरपालिका निवडणुकीत आपल्या राष्ट्रवादी काँग्रेस पार्टीचा महापौर होणार याबाबत माझ्या मनात कुठल्याही प्रकारची शंका नाही असे जयंत पाटील म्हणाले.
याप्रसंगी बोलताना अजितदादा पवार म्हणाले की, “सरकार म्हणून नागरिकांचे प्रश्न सोडवण्यास महाविकास आघाडी कटिबद्ध आहे. पुणे शहरात राष्ट्रवादी काँग्रेस पार्टीच्या प्रत्येक कार्यकर्त्याने स्वतःला झोकून देत पुणेकरांच्या सेवेत उतरावे व महाविकास आघाडीचे सर्व निर्णय पुणे शहरातील शेवटच्या नागरिकांपर्यंत पोचवण्याचा काम माझ्या राष्ट्रवादी काँग्रेस पार्टीच्या कार्यकर्त्यांनी करावे”
ज्येष्ठ नेत्यांसोबत थेट संवाद होत असल्याने कार्यकर्त्यांमध्ये उत्साहाचे वातावरण निर्माण झाले आहे. या परिवार संवाद यात्रेस शहराध्यक्ष प्रशांत जगताप,आमदार चेतन तुपे, सुनील टिंगरे ,जयदेवराव गायकवाड यांच्यासह सर्व आजी-माजी नगरसेवक,सर्व सेल अध्यक्ष,कार्यकारणी सदस्य व मोठ्या प्रमाणात पक्षाचे कार्यकर्ते व पदाधिकारी उपस्थित होते.
