पुणे | महापालिकेत प्रतिनियुक्ती वर आलेले उपायुक्त राजेंद्र मुठे यांची राज्य सरकारकडून बदली करण्यात आली आहे. दरम्यान त्यांच्याकडील पदभार उपायुक्त अजित देशमुख आणि सचिन इथापे यांच्याकडे सोपवण्यात आला आहे. महापालिका आयुक्त विक्रम कुमार यांनी याबाबतचे आदेश जारी केले आहेत.

राजेंद्र मुठे यांची बदली विभागीय आयुक्त कार्यालयात करण्यात आली आहे. त्यामुळे त्यांच्याकडील पदभार आता इतर अधिकाऱ्यांकडे सोपवण्यात आला आहे. मुठे हे मालमत्ता व्यवस्थापन विभाग, दक्षता विभाग आणि उपायुक्त (विशेष) या विभागाचे कामकाज पाहत होते. हा पदभार दोन अधिकाऱ्यांना विभागून देण्यात आला आहे. मालमत्ता व्यवस्थापन विभागाचा अतिरिक्त पदभार कर आकारणी आणि कर संकलन प्रमुख अजित देशमुख यांच्याकडे देण्यात आला आहे. तर दक्षता विभाग आणि उपायुक्त (विशेष) या विभागाचा अतिरिक्त पदभार सामान्य प्रशासन विभागाचे उपायुक्त सचिन इथापे यांच्याकडे देण्यात आला आहे.