राज्य आणि देशातीलच राजकारणाचा केंद्रबिंदू ठरत असलेल्या कसबा विधानसभा मतदारसंघातील नाट्यमय घडामोडी प्रचार संपल्यानंतरही थांबायला तयार नाहीत. कसबा पोटनिवडणुकीच्या मतदानाला आता २४ तासांपेक्षा कमी अवधी शिल्लक राहिला आहे. मात्र, त्यापूर्वी काँग्रेसचे उमेदवार रवींद्र धंगेकर यांनी एक महत्त्वाचा निर्णय घेतला आहे. रवींद्र धंगेकर हे आज सकाळी कसबा गणपतीसमोर उपोषणाला बसले होते. संबधितांवर कारवाई करण्याचे आश्वासन दिल्यानंतर धंगेकरांनी हे उपोषण मागे घेतलं आहे.

भाजपचे नेते आणि पदाधिकारी हे पोलिसांच्या उपस्थितीत कसब्यातील मतदारांना पैसे वाटत असल्याचा आरोप धंगेकर यांनी केला होता. ही लोकशाहीची हत्या आहे. त्यामुळे मी उपोषणाला बसण्याचा निर्णय घेतल्याचे रवींद्र धंगेकर यांनी सांगितले होते. धंगेकरांच्या या आरोपामुळे एकच खळबळ उडाली होती.

दरम्यान धंगेकर यांच्यावर भाजपकडून देखील टीका केली होती. उपमुख्यमंत्री देवेंद्र फडणवीस, शहर अध्यक्ष जगदीश मुळीक आणि आमदार माधुरी मिसाळ यांनी धंगेकर यांना टीकेचे लक्ष्य केले होते.

तर रविंद्र धंगेकर यांच्या आरोपवर जगदीश मुळीक यांनी उत्तर देताना म्हंटलं होतं की, हा कसब्यातील सगळ्या मतदारांचा अपमान आहे, हे सगळे आरोप बिनबुडाचे आहेत, असे खोटे आरोप भाजपच्या उमेदवारावर करुन फक्त सहानुभूती निर्माण करण्याचं काम ते करत असल्याची प्रतिक्रिया पुणे शहर भाजप शहराध्यक्ष जगदीश मुळीक यांनी दिली होती.

आमदार माधुरी मिसाळ म्हणाल्या होत्या,

महाविकास आघाडीचे उमेदवार  धंगेकर यांना कसबा विधानसभा मतदारसंघातील पोटनिवडणुकीत पराभव स्पष्ट दिसू लागला आहे. त्यामुळे पराभूत मानसिकतेतून ते भारतीय जनता पार्टीवर मतदारांना पैसे वाटल्याचा बेछूट आरोप करीत आहेत. हा कसबा विधानसभा मतदारसंघातील मतदारांचा अपमान आहे. तो मतदार कधीही सहन करणार नाही तसेच निवडणुकीतील पराभवाची कारणे धंगेकर यांनी आतापासून शोधण्यास सुरुवात सुरुवात केली आहे. कसबा मतदारसंघातील मतदार मतपेटी द्वारे चोख उत्तर देतील. गेले काही दिवस पोलीस प्रशासन कसबा मतदारसंघातील कायदा आणि सुव्यवस्था राखण्यासाठी आणि शांततेच्या मार्गाने निवडणुका पार पाडाव्यात यासाठी अहोरात्र कार्यरत आहेत. मात्र पोलीस आणि प्रशासन यांच्यावरही धंगेकर यांनी आरोप केले आहेत. यामुळे प्रशासनाचे मनोधैर्य खच्ची होते. मी धंगेकर यांच्या विधानांचा तीव्र शब्दात निषेध करते.

उपमुख्यमंत्री देवेंद्र फडणवीस यांनी हा राजकीय स्टंट असल्याचे म्हटले आहे. विरोधकांच्या पायाखालील वाळू सरकल्याने हे असे उपोषण करावे लागत आहे. तसेच आमचा मतदार पैसे घेऊन मतदान करणारा नाही. असंही फडणवीस यांनी म्हटलं.