Sanitation in Vijayastambh area | भीमा कोरेगावच्या विजयस्तंभ परिसरात स्वच्छतेचा उपक्रम |डॉ. सिद्धार्थ धेंडे यांच्यासह सामाजिक संस्थांचा सहभाग

Categories
Breaking News cultural social पुणे महाराष्ट्र

भीमा कोरेगावच्या विजयस्तंभ परिसरात स्वच्छतेचा उपक्रम

|डॉ. सिद्धार्थ धेंडे यांच्यासह सामाजिक संस्थांचा सहभाग

1 जानेवारी रोजी शौर्य दिनानिमित्त राज्यासह देशभरातून सुमारे 15 लाख भीम अनुयायी भीमा कोरेगाव येथील विजयस्तंभास अभिवादन करण्यासाठी आले होते. त्याच्या दुसऱ्या दिवशी 2 जानेवारी रोजी विजयस्तंभ परिसरामधे स्वच्छता रहावी व स्थानिक रहिवाशांना कोणताही त्रास होऊ नये, यासाठी या परिसरात स्वच्छता मोहीम राबविण्यात आली. पुणे महापालिकेचे माजी उपमहापौर डॉ. सिद्धार्थ धेंडे यांच्यासह विविध सामाजिक संस्थांनी त्यामध्ये सहभाग घेतला. या वेळी परिसरातील कचरा, पाण्याच्या बॉटल, कागद आदी उचलून परिसर स्वच्छ करण्यात आला.

या स्वच्छता उपक्रमात सुनिल माने, जितेंद्र गायकवाड व त्यांचे सर्व सहकारी, निर्भय प्रतीष्ठानचे निखिल गायकवाड, आयुष आंबेडकरी युवा मंचचे सुनिल धतराज व सहकारी, स्वच्छ संस्थाचे चेतन हरनामे व कर्मचारी, आधार पुनावालाचे मल्हार करवंदे, नागेश पवार व सहकारी, पथारी संघटनेचे विजय कांबळे, संदीप चाबुकस्वार तसेच पेरणे ग्रामपंचायतचे सरपंच रुपेश ठोंबरे आदींसह विविध जणांनी सहभाग घेतला.

या वेळी डॉ. सिद्धार्थ धेंडे म्हणाले की, भीमा कोरेगावला ऐतिहासिक वारसा आहे. त्यांच्या आठवणींचे जतन भीम अनुयायी करत असतात. ही ऐतिहासिक आठवण स्मरणात रहावी, यासाठी विजयस्तंभ उभारण्यात आला आहे. त्याला लाखो अनुयायी अभिवादन करण्यासाठी येतात. एवढ्या प्रचंड संख्येनंतर या परिसरातील स्वच्छतेची जबाबदारी देखील आपलीच आहे, या सामाजिक भावनेतून परिसरात स्वच्छता मोहिम राबवली जात आहे. गेल्या सहा वर्षांपासून स्वच्छतेच्या उपक्रमासाठी पुढाकार घेत असल्याचे डॉ. धेंडे यांनी सांगितले. त्याला यश फाउंडेशन, क्रिस्टल संस्था, आयुष आंबेडकरी युवा संघ, स्वच्छ संस्था, आधार पुनावाला संस्था, पेरणे ग्रामपंचायतचे स्वच्छता कर्मचारी या सामाजिक संघटनांची देखील मोलाची साथ मिळत असल्याचे डॉ. धेंडे यांनी सांगितले.

Koregaon Bhima : Rahul Bhandare : कोरेगाव-भीमा येथील क्रांती स्तंभाच्या परिसर विकासासाठी एक कोटी तरतूद

Categories
Breaking News PMC पुणे महाराष्ट्र

कोरेगाव-भीमा येथील क्रांती स्तंभाच्या परिसर विकासासाठी एक कोटी

: स्थायी समितीची मंजुरी

पुणे : शौर्याचे प्रतिक म्हणून कोरेगाव-भीमा येथे उभारण्यात आलेल्या क्रांती स्तंभाच्या परिसरातील सुशोभिकरण आणि विविध प्रकारची विकासकामे करण्यासाठी एक कोटी रुपये उपलब्ध करून देण्यास स्थायी समितीने मान्यता देण्यात आली आहे. याबाबत भाजपचे नगरसेवक राहुल भंडारे  यांनी प्रस्ताव दिला होता. यातून आता तिथे मुलभूत सुविधा उभारण्यात येणार आहेत. अशी माहिती भंडारे यांनी दिली.

: राहुल भंडारे यांनी दिला होता प्रस्ताव

या बाबत भाजपचे नगरसेवक आणि स्थायी समितीचे सदस्य राहुल भंडारे यांनी समिती समोर प्रस्ताव सदर केला होता. त्यानुसार पुणे शहरालगत शौर्याचे प्रतिक म्हणून कोरेगाव भीमा येथे स्मारक उभारण्यात आलेले आहे. दरवर्षी देशभरातून दि. १ जानेवारीला लाखो भीम अनुयायी या क्रांती स्तंभास भेट देण्यासाठी येत असतात. त्याच बरोबर अनेक राजकीय, सामाजिक, शैक्षणिक क्षेत्रातील मान्यवर मंडळी देखील मानवंदना देण्यासाठी येत असतात. दरवर्षी १ जानेवारीला मानवंदना देण्यासाठी मोठया प्रमाणावर भीम अनुयायी येत असतात; परंतू याठिकाणी असलेल्या सोईसुविधा अपुऱ्या असल्याने त्यांची गैरसोय होत असते. तरी कोरेगाव भीमा येथील क्रांती स्तंभाच्या परिसराच्या सुशोभिकरण व विकासासाठी पुणे महानगरपालिकेकडून एक कोटी रुपये उपलब्ध करुन देण्यात यावेत. मंगळवारच्या समितीच्या बैठकीत यावर चर्चा झाली आणि याला मंजुरी देण्यात आली.
शौर्याचे प्रतिक म्हणून कोरेगाव-भीमा येथे उभारण्यात आलेल्या क्रांती स्तंभाला दरवर्षी १ जानेवारीला मानवंदना देण्यासाठी मोठया प्रमाणावर भीम अनुयायी येत असतात; परंतू याठिकाणी असलेल्या सोईसुविधा अपुऱ्या असल्याने त्यांची गैरसोय होत असते. मात्र आता निधी उपलब्ध झाल्याने ही गैरसोय दूर होणार आहे.

           राहुल भंडारे, नगरसेवक