PMC pune | Transfers | महापालिकेत तब्बल 6 वर्षांनी होणार बदल्या! |  मात्र राजकीय नेते पूर्ण समाधानी नाहीत 

Categories
Breaking News PMC Political पुणे

महापालिकेत तब्बल 6 वर्षांनी होणार बदल्या!

|  मात्र राजकीय नेते पूर्ण समाधानी नाहीत

पुणे | पुणे महापालिकेतील सेवकांच्या बदल्या हा महत्वाचा विषय झाला आहे. याबाबत आरोप होऊ लागल्यानंतर आता महापालिका प्रशासनाने तडकाफडकी बदल्या करण्याचा निर्णय घेतला आहे. आता तब्बल 6 वर्षानंतर या नियतकालिक बदल्या होणार आहेत. सुमारे 132 कनिष्ठ अभियंता (JE) च्या पारदर्शक पद्धतीने बदल्या करण्याचा निर्णय महापालिका प्रशासनाने घेतला आहे. अभियंता प्रमाणेच लेखनिकी संवर्गातील बदल्या करताना हाच निकष वापरला जावा, अशी मागणी आता जोर धरू लागली आहे.  दरम्यान असे असले तरी राजकीय नेते मात्र अजून पूर्ण समाधानी नाहीत. सर्वच विभागातील बदल्या तात्काळ कराव्यात अशी मागणी नेत्यांनी केली आहे. (PMC Pune)

गेल्या काही दिवसापासून मनपा वर्तुळात तसेच शहरभरात चर्चेचा असलेला मुद्दा म्हणजे पुणे महानगरपालिका अधिकारी व कर्मचाऱ्यांच्या बदल्या हा आहे.  पुणे महानगरपालिकेचे सर्व अधिकारी व कर्मचाऱ्यांच्या बादल्या दर तीन वर्षांनी करणे, असे धोरण असून या धोरणास हरताळ फासला जात आहे. तसेच  बदल्यांमध्ये लाखोंची उलाढाल होत आहे. असा आरोप राजकीय नेत्यांकडून केला जात होता.  लिपिक टंकलेखक, वरिष्ठ लिपिक, उप अधीक्षक, अधिक्षक, प्रशासन अधिकारी या पदांवर काम करणारे अधिकारी यांच्या खूप वर्षांपासून पासून दर तीन वर्षांनी होणाऱ्या बदल्या झालेल्या नाहीत. त्यामुळे बदल्या करण्याची मागणी केली जात होती. त्यानुसार महापालिका प्रशासनाने बदल्या करण्याचा निर्णय घेतला आहे. जवळपास 132 कनिष्ठ अभियंत्यांचा यात समावेश आहे. त्यामध्ये स्थापत्य पदावरील 109, विद्युत पदावरील 17 आणि यांत्रिकी पदावरील 6 कनिष्ठ अभियंत्यांचा समावेश आहे. (Pune Municipal Corporation)

| मनपा प्रशासनाचे परिपत्रक जारी

 

महापालिका प्रशासनाच्या परिपत्रकानुसार  पुणे महानगरपालिका प्रशासनाकडील ज्या सेवकांची एकाच खात्यात तीन वर्षे अगर त्यापेक्षा जास्त सेवा झाली आहे, अशा सेवकांच्या अन्य खात्यात बदल्या कराव्या लागतात. खात्याच्या एकूण पदांपैकी दरवर्षी जास्तीत जास्त २०% अधिकारी / कर्मचारी यांच्या बदल्या कराव्यात, अशा बदल्या करणेविषयीचे  धोरण आहे. या मंजूर बदली धोरणातील तरतुदी विचारात घेऊन ३१/०३/२०२३ अखेर एकाच खात्यात तीन वर्षे अगर त्यापेक्षा जास्त सेवा झालेल्या अभियांत्रिकी संवर्गातील कनिष्ठ अभियंता (स्थापत्य/विद्युत/यांत्रिकी) या पदावरील सेवकांची नियतकालिक बदल्या करण्याची कार्यवाही अतिरिक्त महापालिका आयुक्त (जनरल) यांचे अध्यक्षतेखाली प्रस्तावित केलेली आहे.
या नियतकालिक बदल्यांची कार्यवाही बुधवार, दिनांक १२/०४/२०२३ रोजी सकाळी ११.०० वाजता, जुना जी.बी. हॉल, पुणे महानगरपालिका मुख्य इमारत, तिसरा मजला, येथे होईल.
महापालिका सभेने मंजूरी दिलेल्या बदली धोरणाप्रमाणे नियतकालिक बदलीस पात्र ठरणाऱ्या कर्मचाऱ्यांची यादी संबंधित सेवकांचे माहितीसाठी पुणे महानगरपालिका संकेत स्थळावरील कार्यालय
परिपत्रक प्रणालीवर (https://pmc.gov.in/en/circulars) उपलब्ध केलेली आहे. नियतकालिक बदलीस पात्र ठरणाऱ्या सेवकांनी वरील नियोजित ठिकाणी व वेळेत समक्ष उपस्थित रहावयाचे आहे.

तरी खातेप्रमुख, प्रशासन अधिकारी यांनी प्रस्तुतचे कार्यालय परिपत्रक आपले अखत्यारीत कार्यरत कनिष्ठ अभियंता (स्थापत्य/विद्युत/यांत्रिकी) या संवर्गातील संबधित सेवकांच्या त्वरीत निदर्शनास आणावे व नोंद घेतल्याबाबत स्वाक्षरी घ्यावी. असे आदेशात म्हटले आहे.
| लेखनिकी संवर्गासाठी हाच न्याय अपेक्षित
कनिष्ठ अभियंता याच्या या नियतकालिक बदल्या पारदर्शक पद्धतीने केल्या जाणार आहेत. ज्यांची सेवा अधिक आहे, अशा सेवकांना बदलीचे खाते विचारले जाणार आहे. त्यानुसार यादी प्रसिद्ध केली असून त्यानुसारच बदली केली जाणार आहे. अभियंता प्रमाणेच लेखनिकी संवर्गातील सेवकांच्या देखील बदल्या प्रलंबित आहेत. त्याही बदल्या लवकरच होणे अपेक्षित आहे. त्यांच्या बदल्या करताना देखील अशाच पारदर्शक पद्धतीने केल्या जाव्यात. अशी मागणी आता जोर धरू लागली आहे.
—-
महापालिका प्रशासनाने 132 JE च्या बदल्या करण्याबाबत निर्णय घेतला, त्याचे आम्ही स्वागत करतो. मात्र बदली केल्यानंतर संबंधित सेवक कामाला एका ठिकाणी आणि पगाराला दुसऱ्या ठिकाणी, असे प्रशासनाने होऊ देऊ नये. तसेच आम्ही एकच खाते किंवा ठराविक सेवकांच्या बदल्या करण्याची मागणी केली नव्हती. नियमानुसार ज्यांनी 3 वर्ष एका खात्यात काम केले आहे आणि बदलीस पात्र असणाऱ्या अशा सर्वांच्या बदल्या आम्हाला अपेक्षित आहेत. टप्प्या टप्प्याने बदल्या आम्हाला मंजूर नाहीत.
अरविंद शिंदे, शहर अध्यक्ष, काँग्रेस.
आमच्या मागणीनुसार महापालिका प्रशासनाने बदल्या करण्याचा निर्णय घेतला, याबद्दल आम्हाला आनंद आहे. मात्र मलईदार खात्यात गेल्या कित्येक वर्षांपासून जे सेवक काम करताहेत, त्यांच्या तात्काळ बदल्या होणे अपेक्षित आहे. जेणेकरून सर्वांना सर्व खात्यात काम करण्यास प्राधान्य मिळेल. 
नाना भानगिरे, शहर अध्यक्ष, शिवसेना 
हे आहेत सेवक