PMPML | गुन्हे दाखल करूनही पीएमपीच्या बस थांब्यावरील जाहिराती थांबेनात | पीएमपी घेणार आक्रमक पवित्रा

Categories
Breaking News पुणे

गुन्हे दाखल करूनही पीएमपीच्या बस थांब्यावरील जाहिराती थांबेनात

| पीएमपी घेणार आक्रमक पवित्रा

पुणे महानगर परिवहन महामंडळाकडून (PMPML) शहरात प्रवाशांच्या सोईसाठी उभारण्यात आलेले अनेक बस थांबे (Bus Stop) बेकायदा जाहिरातींनी (Illegal Advertisement) गजबजून गेले आहेत. त्यामुळे बस थांब्यांवर प्रवाशांना वेळापत्रक व मार्गाची माहिती मिळत नाही. तसेच, थांब्यांचे विद्रुपीकरण देखील होत आहे. याआधी अशा जाहिराती करणाऱ्यावर गुन्हे देखील दाखल करण्यात आले आहेत. तरी देखील जाहिराती थांबेनात. त्यामुळे पीएमपीने आता थांब्यांवर बेकायदा जाहिराती करणाऱ्यांवर कायदेशीर कारवाईचा इशारा दिला आहे. (PMPML Pune)

पुणे, पिंपरी-चिंचवड आणि ग्रामीण भागात पीएमपीकडून 1600 ते 1700 बसच्या माध्यमातून सेवा दिली जाते. बस थांब्यावरील शेडच्या ठिकाणी मार्गाची माहिती, वेळापत्रक लावले आहे. पण, अनेक जण वाढदिवसाच्या जाहिराती थांब्यांवर लावतात. तर, काही स्थानिक राजकीय व्यक्तींच्या जाहिराती बेकायदा थांब्यांवर लागल्या जातात. त्याबरोबर काही कंपन्या, संस्था पत्रके थांब्यांवर लावतात. यामुळे प्रवाशांच्या सोईसाठी थांब्यांवर लावलेली माहिती झाकाळली जाते. तसेच, बस थांब्यांचे विद्रुपीकरण होते. त्यामुळे अशा जाहिराती करणाऱ्यांवर पीएमपीबरोबरच पुणे व पिंपरी-चिंचवड महापालिकेकडून कारवाई केली जाते.

पीएमपीच्या थांब्यांवर अशा जाहिराती वाढू लागल्यामुळे आता पीएमपीने त्या लावणाऱ्यांवर कायदेशीर कारवाई करण्याचा इशारा दिला आहे. त्यामुळे नागरिकांनी पीएमपीच्या थांब्यांवर बेकायदा जाहिराती लावू नयेत, अशा जाहिराती लावणाऱ्यांवर महाराष्ट्र मालमत्ता विद्रुपीकरण प्रतिबंध अधिनियमनुसार कारवाई करण्याचा इशारा पीएमपीने दिला आहे.

Good News For PMPML Employees | पीएमपी कर्मचाऱ्यांना सातवा वेतन आयोग लागू | डिसेंबर च्या वेतनात फरकाची ५०% रक्कम जमा केली जाणार

Categories
Breaking News PMC Political पुणे

पीएमपी कर्मचाऱ्यांना सातवा वेतन आयोग लागू | डिसेंबर च्या वेतनात फरकाची ५०% रक्कम जमा केली जाणार

पुणे : पीएमपीच्या कर्मचाऱ्यांना (PMPML employees) अखेर सातवा वेतन आयोगा (7th pay commission) लागू झाला आहे. त्यानुसार वेतन मिळणार आहे. महापालिकेच्या धर्तीवर सातव्या वेतन आयोगा नुसार डिसेंबर महिन्याच्या वेतनात आयोगाच्या फरकानुसार वाढणाऱ्या वेतनाची 50 टक्के रक्कम जमा केली जाणार आहे. तर जानेवारी 2023 मध्ये आयोगा बाबत मुख्यमंत्री एकनाथ शिंदे (CM Eknath Shinde) आणि दोन्ही महापालिका आयुक्तांची संयुक्त बैठक घेऊन सातवा वेतन आयोग लागू केल्यानंतर उर्वरीत 50 टक्केवाढीनुसार, वेतन देण्यास सुरूवात केली जाणार आहे.(7th pay commission for PMPML Employees)

पीएमपी कर्मचाऱ्यांच्या सातव्या वेतन आयोगाबाबत बाळासाहेबांची शिवसेना पक्षाचे शहर प्रमुख नाना भानगिरे (Nana Bhangire) यांनी मुख्यमंत्र्यांकडे पाठपुरावा केला होता. तसेच पीएमपी कामगार संघटना देखील यासाठी प्रयत्न करत होत्या. त्यानंतर, आज पीएमपी मध्ये या मागणीबाबत बैठक घेण्यात आली. त्यात, हा निर्णय घेण्यात आल्याचे भानगिरे यांनी सांगितले. पीएमपीचे अध्यक्ष आणि व्यवस्थापकीय संचालक ओम प्रकाश बकोरिया (PMP CMD Omprakash Bakoriya) यांनी ही बैठक घेतली. नाना भानगिरे यांच्यासह कामगार प्रतिनिधी नरेंद्र आवारे, श्रवण तौर, उमेश पांढरे यावेळी उपस्थित होते. (7th pay commission)

भानगिरे यांनी दिलेल्या माहितीनुसार, पीएमपी कामगारांना सातवा वेतन आयोग मिळावा यासाठी मुख्यमंत्री एकनाथ शिंदे यांच्याकडे सातत्याने पाठपुरावा केला. त्यानंतर, मुख्यमंत्री एकनाथ शिंदे यांनीही याबाबत घोषणा केली होती. त्यानुसार, ही बैठक घेण्यात आली. यात पीएमपीचे व्यवस्थापकीय संचालक बकोरिया डिसेंबर महिन्याच्या वेतनापासूनच सातव्या वेतन आयोगाच्या फरकानुसारची 50 टक्के वेतनवाढ दिली जाणार असल्याचे सांगितले आहे. त्यामुळे, सुमारे 11 हजार कर्मचाऱ्यांना याचा लाभ होणार असून जानेवारी महिन्यात याबाबत अंतीम निर्णय होऊन त्यानंतर आयोगानुसार, उर्वरीत 50 टक्के रकमेचे वेतन सुरू केले जाणार आहे. या शिवाय, पीएमपीच्या कर्मचाऱ्यांना हक्काचे घर मिळावे यासाठी जागा निश्‍चित करणे , वैद्यकीय बिलांसाठी तातडीनं निधी उपलब्ध करून तसेच डेपोच्या परिसरात महिला व पुरूषांसाठी स्वतंत्र स्वच्छतागृह उभारणे , कर्मचाऱ्यांसाठी कॅन्टीन सुरू करणार अशा मागण्याही मान्यता करण्यात आल्याचे भानगिरे यांनी स्पष्ट केले. (PMPML pune)
—————————

कामगार संघटनेच्या सोबत आज बैठक झाली. त्यानुसार, सातव्या वेतन आयोगाच्या नुसार, वेतनाच्या फरकात 50 टक्केवाढ केली जाणार आहे. त्याबाबत उद्या ( मंगळवारी) अधिकृत आदेश काढला जाणार आहे. तर उर्वरीत वेतनवाढ मुख्यमंत्री एकनाथ शिंदे यांच्या सोबत बैठक झाल्यानंतर घेण्यात येईल.

ओम प्रकाश बकोरीया ( अध्यक्ष आणि व्यवस्थापकीय संचालक, पीएमपीएमएल)

PMPML in rural areas | ग्रामीण भागातील पीएमपीएमएलची बससेवा पुन्हा होणार पूर्ववत | सुप्रिया सुळे यांनी देखील केली होती मागणी

Categories
Breaking News Political social पुणे महाराष्ट्र

ग्रामीण भागातील पीएमपीएमएलची बससेवा पुन्हा होणार पूर्ववत

| पालकमंत्री चंद्रकांतदादा पाटील यांच्या पीएमपीएमएलचे अध्यक्ष ओमप्रकाश बकोरिया यांना सूचना

ग्रामीण भागातील विविध मार्गांवरील पीएमपीएमएलची बससेवा (PMPML Bus Sevice) पुन्हा पूर्ववत करण्याच्या सूचना पालकमंत्री चंद्रकांतदादा पाटील (Guardian Minister Chandrakant patil) यांनी पीएमपीएमएलचे अध्यक्ष ओमप्रकाश बकोरिया (PMPML CMD Omprakash Bakoriya) यांना दिल्या असून, त्यामुळे ग्रामीण भागातील (Rural Area) नागरिकांना यामुळे मोठा दिलासा मिळणार आहे.

कोरोना काळानंतर जनजीवन पूर्वपदावर येत असताना पीएमपीएमएल प्रशासनाने ग्रामीण भागातील नागरिकांसाठी ‌अनेक मार्गांवर आपली बससेवा सुरू केली होती. मात्र जनजीवन पूर्वपदावर आल्यानंतर महाराष्ट्र राज्य मार्ग परिवहन महामंडळाची बससेवादेखील सुरू झाली. त्यामुळे महामंडळाने पीएमपीएमएल प्रशासनाकडे पत्र लिहून सदर मार्गांवरील बससेवा बंद करण्याची विनंती केली होती.

महाराष्ट्र राज्य मार्ग परिवहन महामंडळाच्या पत्रानंतर ग्रामीण भागातील विविध मार्गांवरील बससेवा टप्प्याटप्प्याने बंद करण्याचा निर्णय पीएमपीएमएल प्रशासनाने घेतला होता. पत्राच्या अनुषंगाने नोव्हेंबर महिन्याच्या अखेरीस ११ मार्गांवरील बससेवा बंद करण्याचा निर्णय घेतला. तर डिसेंबर महिन्याच्या सुरुवातीला अजून १२ मार्गांवरील बससेवा बंद करण्याचा निर्णय घेतला.‌ पीएमपीएमएल प्रशासनाच्या या निर्णयाची टप्प्याटप्प्याने अंमलबजावणी करण्यात येत होती‌. मात्र, ग्रामीण भागातील पीएमपीएमएलची बससेवा सुरू ठेवण्याची मागणी नागरिकांकडून करण्यात येत होती.

पालकमंत्री चंद्रकांतदादा पाटील यांनी नागरिकांच्या समस्येची दखल घेऊन पीएमपीएमएलचे संचालक ओमप्रकाश बकोरिया यांना आज सदर भागातील बससेवा पूर्ववत करण्याच्या सूचना दिल्या आहेत. यामुळे ग्रामीण भागातील नागरिकांसाठी सुविधा होणार आहे.

| सुप्रिया सुळे यांनी देखील केली होती मागणी

पीएमपीएमएलने पुणे शहराच्या लगत असणाऱ्या व दौंड, मुळशी,पुरंदर, वेल्हा खडकवासल्याच्य ग्रामीण भागातील बससेवा बंद केली आहे. ती पुन्हा सुरु करणे गरजेचे आहे. याबाबत मी ट्विट देखील केले आहे. प्रत्येक गोष्टीत राजकारण आणू नये आणि शिक्षणातर अजिबातच राजकारण होता कामा नये. त्यामुळे माझी राज्य शासनाला विनंती आहे की, पीएमटीमधून लाखो मुले शिक्षणासाठी पुण्याला येतात. त्यामुळे ग्रामीण भागातील मुलांनाही तो अधिकार आहे कारण ते देखील राज्याचे देशाचे नागरिक आहेत. अगोदर ही बससेवा सुरु होती अजितदादा पालकमंत्री असताना आपण बससेवेत वाढ केली होती. त्यामुळे विद्यार्थी, नोकरदार, जेष्ठ नागरिक यांना त्याचा फायदा होत होता.पण आता पीएमटीने नवीन नियमावली केली आहे. त्याअंतर्गत ही सेवा बंद केली आहे.आपण पायाभूत सुविधा, रस्ते, मेट्रो यासाठी ज्याप्रमाणे निधी दिला जातो मग विद्यार्थ्यांच्या भवितव्यासाठी निधी का दिला जावू शकत नाही. शिवाय या पीएमटीचा खर्च खुप कमी आहे. त्यामुळे माझी ईडी सरकारला विनंती आहे की ग्रामीण भागातील बंद केलेली सेवा पुन्हा एकदा मुलांसाठी सुरू करावी कारण ती फार संघर्ष करुन शिकत असतात.त्यांचे नुकसान टाळण्यासाठी ही सेवा पुन्हा एकदा सुरु करावी. (MP Supriya Sule)

PMPML | BRTS | पीएमपीने  बीआरटी बसस्थानकामधील सुरक्षारक्षकांची नियुक्ती थांबवली  | आर्थिक कारणास्तव पीएमपीचा धोरणात्मक निर्णय 

Categories
Breaking News PMC पुणे

पीएमपीने  बीआरटी बसस्थानकामधील सुरक्षारक्षकांची नियुक्ती थांबवली

| आर्थिक कारणास्तव पीएमपीचा धोरणात्मक निर्णय

पुणे |. पुणे महानगरपालिका (PMC Pune) हद्दीमध्ये संगमवाडी ते विश्रांतवाडी, येरवडा ते आपले घर आणि स्वारगेट ते कात्रज या बीआरटी मार्गामध्ये (BRTS Route) परिवहन महामंडळामार्फत (PMPML) बीआरटी बसेसचे संचलन सुरू आहे. या मार्गावर सुरक्षारक्षक (Security Guard) नेमण्यात आले होते. मात्र आर्थिक बोजा सहन होत नसल्याने पीएमपी कडून सुरक्षा रक्षक नियुक्त करण्यात येणार नाहीत. याबाबतचा धोरणात्मक निर्णय (Policy) पीएमपी कडून घेण्यात आला आहे.
 बीआरटी मार्गामधील बसस्थानकामधील विद्युत उपकरणे, स्वयंचलित दरवाजे, यूपीएस आणि बॅटरी संच यांच्या तसेच प्रवाशांच्या सुरक्षिततेकरिता परिवहन महामंडळामार्फत तीन शिफ्टमध्ये खाजगी सुरक्षारक्षकांची नियुक्ती करण्यात आलेली होती. तथापि सद्यथितिमध्ये  अध्यक्ष व व्यवस्थापकीय संचालक यांचे आदेशानुसार १ डिसेंबर पासून  सर्व बीआरटी बसस्थानकामधील खाजगी सुरक्षारक्षकांची नियुक्ती थांबविण्याचा धोरणात्मक
निर्णय घेण्यात आलेला आहे.

PMPML | रिक्षा आंदोलनाचा पीएमपीला फायदा | ‘पीएमपीएमएल’ने दैनंदिन उत्पन्नात ओलांडला २ कोटींचा टप्पा

Categories
Breaking News social पुणे

रिक्षा आंदोलनाचा पीएमपीला फायदा | ‘पीएमपीएमएल’ने दैनंदिन उत्पन्नात ओलांडला २ कोटींचा टप्पा

| पीएमपीएमएल स्थापनेनंतर प्रथमच तिकीट विक्रीतून मिळाले उच्चांकी उत्पन्न

२८ नोव्हेंबर  रोजी रिक्षा संघटनांनी बेमुदत संप पुकारल्याने पीएमपीएमएलने दैनंदिन उत्पन्नात २
कोटी रूपयांचा टप्पा पार केला असून पीएमपीएमएलला प्रथमच पीएमपीएमएल स्थापनेपासून १५ लाख ४७ हजार ९४६ प्रवाशांनी पीएमपीएमएल च्या बससेवेवर विश्वास दाखवून बससेवेचा वापर केल्याने निव्वळ तिकीट विक्रीतून १,९२,०८,९६८ रु. एवढे उच्चांकी उत्पन्न मिळाले. पास विक्रीतून १२,६२,७५५ रु. एवढे उत्पन्न मिळाले असून असे एकूण २ कोटी ४ लाख ७८ हजार ७२३ रूपये इतक्या विक्रमी उत्पन्नाचा टप्पा पार केला आहे. यापूर्वी दि. १४ नोव्हेंबर २०२२ व दि. ४ जानेवारी २०१६ रोजी २ कोटी रूपयांचे दैनंदिन उत्पन्न पार करण्यात पीएमपीएमएल ला यश आले होते. अशी माहिती पीएमपी प्रशासनाच्या वतीने देण्यात आली.

२८ नोव्हेंबर २०२२ रोजी रिक्षा संघटनांनी बेमुदत संप पुकारल्याने पीएमपीएमएलने दैनदिन संचलनात
असलेल्या बसेस व्यतिरिक्त शंभर जादा बसेस पुणे – पिंपरी चिंचवड शहरातील नागरिकांच्या सेवेसाठी १७४० बसेस संचलनात आणल्या होत्या. तसेच पुणे – पिंपरी चिंचवड शहर हद्दीबाहेरील बसेस कमी करून दोन्ही शहरात संचलनात ठेवल्या होत्या. वाहतूक कोंडीचा विचार करता पीएमपीएमएल च्या ताफ्यात असणाऱ्या पर्यावरणपूरक स्मार्ट एसी ईलेक्ट्रीक बस व सीएनजी बसेसचा वापर शहरवासियांनी व शहरात येणाऱ्या प्रवाशांनी वाढविला आहे. दि. २८ नोव्हेंबर २०२२ रोजी १५,४७,९४६ प्रवाशांनी पीएमपीएमएल च्या बससेवेचा वापर केल्याने दैनंदिन उत्पन्नात २ कोटी रूपयांचा टप्पा पार करण्यात यश आले आहे. यामुळे पुणे व पिंपरी चिंचवड शहरांची लाईफलाईन म्हणून ओळख असलेली पीएमपीएमएलची बससेवा ही किफायतशीर, सुरक्षित व विश्वासार्ह असल्याचे यातून पुन्हा एकदा अधोरेखित झाले आहे.
मजूर, कामगार, नोकरदार, ज्येष्ठ नागरिक, महिला प्रवाशांनी पीएमपीएमएलच्या बससेवेवर नेहमीच विश्वास
दाखवला आहे. त्याचबरोबर शहरातील शाळा व कॉलेज पुन्हा पूर्ण क्षमतेने सुरू झाल्याने दररोज प्रवास करणाऱ्या विद्यार्थी संख्येत देखील लक्षणीय वाढ झाली आहे. दैनंदिन प्रवाशी संख्या व दैनंदिन उत्पन्नामध्ये झालेली वाढ ही प्रवाशांनी पीएमपीएमएल च्या बससेवेवर दाखविलेला विश्वास आहे. प्रवाशांनी पीएमपीएमएल च्या पर्यावरणपूरक स्मार्ट एसी ईलेक्ट्रीक बस व सीएनजी बसेसचा जास्तीत जास्त वापर करावा, असे आवाहन पीएमपीएमएल कडून करण्यात येत आहे.

Alandi Yatra | आळंदी यात्रेनिमित्त पीएमपीएमएल कडून जादा बसेसचे नियोजन

Categories
Breaking News cultural पुणे महाराष्ट्र

आळंदी यात्रेनिमित्त पीएमपीएमएल कडून जादा बसेसचे नियोजन

कार्तिकी एकादशी व श्री. संत ज्ञानेश्वर महाराज यांच्या संजीवन समाधी सोहळ्या निमित्त श्री. क्षेत्र आळंदी,
यात्रेसाठी १७ ते २३ नोव्हेंबर या कालावधी करिता मार्गावरील ९७ व जादा २०३ सर्व मिळून ३०० बसेस देण्यात येत असून दिनांक १९ ते दिनांक २२/११/२०२२ या चार दिवसा करिता रात्रौ बससेवा गरजेनुसार देण्यात येणार आहे. यात्रेनिमित्ताने आळंदी गावातील सध्याचे बसस्थानक स्थलांतरीत करून ते काटेवस्ती येथून संचलन करण्यात येत आहे. अशी माहिती पीएमपी प्रशासनाच्या वतीने देण्यात आली.

यात्रेसाठी देण्यात येणाऱ्या रात्रौ १० वा. नंतर जादा बससेवेसाठी (नेहमीची बससेवा संपल्यानंतर) सध्याच्या तिकिट दरा पेक्षा रूपये ५/- जादा तिकिट दर आकारणी करण्यात येईल. तसेच, पुणे महानगर परिवहन महामंडळाकडून देण्यात येणाऱ्या एकदिवसीय, साप्ताहिक, मासिक, जेष्ठ नागरिक व इतर पासधारकास यात्राकालावधीत रात्रौ १० वा. नंतर जादा बससेवेसाठी पासचा वापर करून प्रवास करता येणार नाही.
उपरोक्त आळंदी यात्रेसाठी येणाऱ्या भाविकांच्या वाहतुकीच्या सोईसाठी जादा बससेवा देणे गरजेचे आहे. सदरची गरज ही महामंडळाकडील सध्याच्याच बसेसमधुन पूर्ण करणे भाग पडत आहे. यासाठी शहरातील बसमार्गावरील संचलनात असलेल्या बसेसमधूनच काही बसेस कमी करून गरज भागविण्यात येईल. त्याचप्रमाणे आळंदी मार्गावरील मार्ग क्रमांक २६४ भोसरी ते पाबळ व मार्ग क्रमांक २५७ आळंदी ते मरकळ हे मार्ग यात्रेच्या काळात संपूर्णत: बंद राहतील. तरी संबंधित मार्गावरील प्रवाशी नागरिकांनी पी.एम.पी.एम.एल. ला सहकार्य करावे असे आवाहन करण्यात येत आहे.

PMPML’s bus services | ‘पीएमपीएमएल’ ने दैनंदिन उत्पन्नात ओलांडला २ कोटींचा टप्पा | १३ लाख प्रवाशांनी केला पीएमपीएमएल च्या बससेवेचा वापर

Categories
Breaking News social पुणे

‘पीएमपीएमएल’ ने दैनंदिन उत्पन्नात ओलांडला २ कोटींचा टप्पा

| १३ लाख प्रवाशांनी केला पीएमपीएमएल च्या बससेवेचा वापर

पीएमपीएमएलने दैनंदिन उत्पन्नात  १४ नोव्हेंबर २०२२ रोजी २ कोटी रूपयांचा टप्पा पार केला. १३ लाख प्रवाशांनी पीएमपीएमएल च्या बससेवेवर विश्वास दाखवून बससेवेचा वापर केल्याने २ कोटी रूपये इतक्या विक्रमी उत्पन्नाचा टप्पा पार केला. अशी माहिती पीएमपी प्रशासनाच्या वतीने देण्यात आली.

१४ नोव्हेंबर रोजी १६५७ बसेस संचलनात होत्या. यापूर्वी ४ जानेवारी २०१६ रोजी २ कोटी रूपयांचे दैनंदिन उत्पन्न पार करण्यात पीएमपीएमएल ला यश आले होते. वाहतूक कोंडीचा विचार करता पीएमपीएमएल च्या ताफ्यात असणाऱ्या पर्यावरणपूरक स्मार्ट एसी ईलेक्ट्रीक बस व सीएनजी बसेसचा वापर शहरवासियांनी व शहरात येणाऱ्या प्रवाशांनी वाढविला आहे. १४ नोव्हेंबर २०२२ रोजी १३ लाख प्रवाशांनी पीएमपीएमएल च्या बससेवेचा वापर केल्याने दैनंदिन उत्पन्नात २ कोटी रूपयांचा टप्पा पार करण्यात यश आले आहे. यामुळे पुणे व पिंपरी चिंचवड शहरांची लाईफलाईन म्हणून ओळख असलेली पीएमपीएमएलची बससेवा ही किफायतशीर, सुरक्षित व विश्वासार्ह असल्याचे यातून पुन्हा एकदा अधोरेखित झाले आहे.

मजूर, कामगार, नोकरदार, ज्येष्ठ नागरिक, महिला प्रवाशांनी पीएमपीएमएलच्या बससेवेवर नेहमीच विश्वास
दाखवला आहे. त्याचबरोबर शहरातील शाळा व कॉलेज पुन्हा पूर्ण क्षमतेने सुरू झाल्याने दररोज प्रवास करणाऱ्या विद्यार्थी संख्येत देखील लक्षणीय वाढ झाली आहे. दैनंदिन प्रवाशी संख्या व दैनंदिन उत्पन्नामध्ये झालेली वाढ ही प्रवाशांनी पीएमपीएमएल च्या बससेवेवर दाखविलेला विश्वास आहे. प्रवाशांनी पीएमपीएमएल च्या पर्यावरणपूरक स्मार्ट एसी ईलेक्ट्रीक बस व सीएनजी बसेसचा जास्तीत जास्त वापर करावा, असे आवाहन पीएमपीएमएल कडून करण्यात आले आहे.

BRTS | PMPML | PMC Pune | बीआरटी मार्गातील बसस्थानकाजवळील पादचारी मार्गामध्ये स्पीड टेबल बसवण्याची पीएमपीची मागणी 

Categories
Breaking News PMC social पुणे

बीआरटी मार्गातील बसस्थानकाजवळील पादचारी मार्गामध्ये स्पीड टेबल बसवण्याची पीएमपीची मागणी

| महापालिकेकला पीएमपीचे पत्र

पुणे |. पुणे मनपा हद्दीमधील बीआरटी मार्गातील बसस्थानकाजवळील पादचारी मार्गामध्ये स्पीड टेबल बसवण्याची व स्पीड टेबलच्या दोन्ही बाजूस ५० फुट अंतरावर थर्मोप्लास्टिक मार्किंग करण्याची मागणी पीएमपी प्रशासनाने महापालिका प्रशासनाकडे केली आहे. याबाबत पीएमपी कडून महापालिकेला पत्र देण्यात आले आहे.

पीएमपीच्या पत्रानुसार पुणे महानगरपालिका हद्दीमधील संगमवाडी ते विश्रांतवाडी, येरवडा ते आपले घर आणि स्वारगेट ते कात्रज या बीआरटी मार्गामध्ये परिवहन महामंडळामार्फत बीआरटी बसेसचे संचलन सुरू आहे. पुणे मनपा हद्दीमधील सर्व बीआरटी बसस्थानके हि रस्त्याच्या मध्यभागी असल्यामुळे रस्ता ओलांडताना प्रवाशांना धोकादायकरित्या रस्ता ओलांडावा लागत आहे. दैनदिन तपासणी करताना असे निदर्शनास आले आहे की पादचारी मार्गामध्ये स्पीड टेबल नसल्यामुळे तसेच अपुऱ्या सुरक्षाविषयक उपाययोजनांमुळे बीआरटी मार्गामध्ये वारंवार अपघात होत आहेत.  प्रवाशांच्या सुरक्षिततेकरिता सर्व बीआरटी बसस्थानकाजवळ स्पीड टेबल व स्पीड टेबलच्या दोन्ही बाजूस ५० फुट अंतरावर थर्मोप्लास्टिक मार्किंग करणे अत्यंत आवश्यक आहे. तसेच सदर ठिकाणी ब्लिंकर सिग्नल आणि सुरक्षाविषयक माहितीफलक बसविणे देखील गरजेचे आहे.

त्यामुळे  प्रवाशांच्या सुरक्षिततेसाठी पिंपरी चिंचवड मनपा हद्दीमधील बीआरटी धर्तीवर पुणे मनपा हद्दीमधील सर्व बीआरटी बसस्थानकाजवळ स्पीड टेबल आणि वरील नमूद सुरक्षाविषयक उपाययोजना करण्यात यावेत. अशी मागणी करण्यात आली आहे.

PMP CMD | महापालिकेचा बावधन येथील बंगला पीएमपी सीएमडीना भाडे तत्वावर दिला जाणार 

Categories
Breaking News PMC पुणे

महापालिकेचा बावधन येथील बंगला पीएमपी सीएमडीना भाडे तत्वावर दिला जाणार

| शहर सुधारणा समितीसमोर प्रस्ताव

पुणे : पीएमपीच्या सीएमडी पदी नुकतीच ओमप्रकाश बकोरिया यांची नियुक्ती राज्य सरकार कडून करण्यात आली आहे. कायद्यानुसार पीएमपी सीएमडीना निवासस्थानाची सुविधा पुरविण्यात येते. त्यानुसार बकोरिया यांनी महापालिकेच्या ताब्यातील बावधन येथील बंगला भाडे तत्वावर देण्याची मागणी केली आहे.  महापालिका प्रशासनाने देखील याबाबत सकारात्मक भूमिका दाखवली असून याबाबतचा प्रस्ताव शहर सुधारणा समिती समोर ठेवला आहे. यावर समितीच्या पुढील बैठकीत चर्चा होईल.

समितीच्या पत्रानुसार  पीएमपीचे अध्यक्ष व व्यवस्थापकिय संचालक, पुणे महानगर परिवहन महामंडळ लि. यांनी  १४/१०/२०२२ रोजीच्या शासन आदेशानुसार पुणे महानगर परिवहन महामंडळ लि.चे अध्यक्ष व व्यवस्थापकिय संचालक म्हणून नेमणूक केली असल्याचे कळवून त्यांचे निवास स्थानासाठी विषयांकित ठिकाणचा पुणे महानगरपालिकेच्या मालकीचा सद्यस्थितीत रिक्त असणारा बंगला उपलब्ध करून देणेविषयी विनंती केली आहे.  पत्रात त्यांनी मान्य दरानुसार भाडे तत्वावर निवासस्थानाकरीता मिळावा असे नमूद केले आहे. पुणे पेठ बावधन स.नं.२०/३/७+३/८ येथील अॅमेनिटीस्पेसने आरक्षित सुमारे १४९६.१७ चौ.मी क्षेत्राची जागा त्यामधील तळ मजला+पहिला मजला बंगल्याचे बांधकामासहित दि. २५/०९/२०१३ रोजी पुणे महापालिकेच्या ताब्यात आलेला आहे.

मिळकत वाटप नियमावली सन २००८ मधील तरतूदीनुसार पुणे मनपाची मिळकत जास्तीत जास्त १२ महिने पेक्षा कमी कालावधीकरीता भाडे तत्वावर देणेचे अधिकार  महापालिका आयुक्त यांना आहेत. व त्यापुढील कालावधीसाठी मुख्य सभेची मान्यता असणे आवश्यक आहे. सदर बंगला भाड्याने मिळण्याकरीता अद्याप कोणतीही मागणी या विभागाकडे प्राप्त झालेली नाही. सदर बंगल्याचा वापर यापूर्वी अति.महापालिका आयुक्त यांचेमार्फत सुरू होता. सद्यस्थितीत सदर बंगला हा रिकामा आहे. त्यामुळे अ व व्यवस्थापकिय संचालक, पुणे महानगर परिवहन महामंडळ लि. यांनी मागणी केल्यानुसार विषयांकित सुविधा बंगला निवास स्थानासाठी देणे शक्य आहे व त्यामुळे पुणे मनपास आर्थिक उत्पन्न सुध्दा प्राप्त होणार आहे. त्यामुळे हा बंगला दिला जाणार आहे.
प्रस्तावात पुढे म्हटले आहे कि संबंधित बंगल्याची दुरुस्ती आणि साफसफाईचा खर्च पीएमपीला करावा लागणार आहे. शिवाय मान्य दरानुसार भाडे द्यावे लागणार आहे. बकोरिया पदावर असेपर्यंत हा बंगला त्यांना निवासासाठी दिला जाईल.

Air Quality | Pune | हवा गुणवत्ता सुधारणेच्या पुण्याच्या प्रयत्नांचा जागतिक पातळीवर गौरव | जगातील शंभर अग्रेसर शहरांच्या समुहाकडून पुरस्कार जाहीर

Categories
Breaking News cultural social देश/विदेश पुणे महाराष्ट्र

हवा गुणवत्ता सुधारणेच्या पुण्याच्या प्रयत्नांचा जागतिक पातळीवर गौरव

| जगातील शंभर अग्रेसर शहरांच्या समुहाकडून पुरस्कार जाहीर

वायू प्रदुषणाच्या समस्येला तोंड देण्यासाठी सार्वजनिक वाहतूक व्यवस्थेमध्ये अधिकाधिक ई-बसेसचा समावेश करत पुणे शहराने हवेची गुणवत्ता सुधारण्यासाठी यशस्वी प्रयत्न केले आहेत. याच प्रयत्नांची दखल जागतिक पातळीवरील जवळपास १०० अग्रेसर शहरांच्या समूहाने घेतली असून ‘युनायटेड टू क्लीन द एअर वुई ब्रीद’ या गटात पुणे शहराची पुरस्कारासाठी निवड केली आहे.

हवामान बदलाच्या समस्यांना तात्काळ प्रतिसाद देत उपाययोजना करणाऱ्या जगातील जवळपास १०० अग्रेसर शहरांचा ‘सी-४०’ हा समूह कार्यरत आहे. या समुहामार्फत हवामान बदलाच्या समस्यावर उपाययोजनांसाठी विविध क्षेत्रात केल्या जाणाऱ्या उत्कृष्ट कामगिरीचा गौरव करुन समुहात समाविष्ट शहरांना प्रोत्साहन दिले जाते. या समुहाने अर्जेंटिना देशातील ब्यूनास आयरेस शहरात झालेल्या कार्यक्रमात पुणे शहराला ‘सी-४०’ सिटीज ब्लूमबर्ग फिलानथ्रोपीज अ‍ॅवार्डस’चे विजेते म्हणून जाहीर केले आहे.

‘युनायटेड टू ॲक्सलरेट इमिडिएट ॲक्शन इन क्रिटीकल सेक्टर्स’, ‘युनायटेड टू क्लीन द एअर वुई ब्रीद’, ‘युनायटेड टू बिल्ड रेझिलीएन्स’, ‘युनायटेड टू इनोव्हेटीव्ह, ‘युनायटेड टू बिल्ड अ क्लायमेट मूव्हमेंट अशा पाच गटात यावर्षी पुरस्कार देण्यात आले. त्यापैकी हवेच्या गुणवत्तेबाबतचा पुरस्कार पुणे शहराला जाहीर करण्यात आला. पुणे महानगरपालिकेचे आयुक्त विक्रम कुमार हे या कार्यक्रमास ऑनलाईनरित्या उपस्थित होते.

शहरातील वायू प्रदुषणाच्या समस्येवर उपाययोजनेंतर्गत उत्सर्जन कमी करणे, हवेची गुणवत्ता वाढण्यासाठी उपाययोजना करणे आणि त्या माध्यमातून नागरिकांचे आरोग्य सुरक्षित करणे या निकषांवर पुणे महानगरपालिकेने केलेल्या कामगिरीमुळे शहराचा गौरव करण्यात आला आहे.

शहरात ईलेक्ट्रिक बसेसमुळे उत्सर्जन कमी होण्यासह हवेची गुणवत्ता सुधारण्यात मदत होत आहे. पुणे महानगरपालिकेने पीएमपीएमएलच्या ताफ्यात जास्तीत जास्त ई-बसेस समाविष्ट करण्यावर भर दिला आहे. ई-बसेसच्या वापराचे विविध फायदे असून सर्व बसेसच्या आयुर्मान कालावधीत पेट्रोल व डिझेलवरील वाहनांच्या तुलनेत सुमारे साडेसहाशे कोटी रुपयांची बचत होऊ शकेल. तसेच सुमारे ३ हजार कार रस्त्यावरुन काढून घेतल्यामुळे जेवढे उत्सर्जन कमी होईल तेवढे या बसेसच्या वापरामुळे कमी होऊ शकेल. यासाठी सर्व बसेस या दिव्यांगस्नेही असल्यामुळे तसेच काही बसेस केवळ महिलांसाठी चालवण्यात येत असल्यामुळे सर्वच घटकातील नागरिकांना या बसेसचा वापर सुरक्षित आणि सुलभ वाटतो.

—-

 शहराला ‘ सी-४०’ पुरस्कार जाहीर झाल्याबद्दल आम्हाला अतिशय आनंद झाला आहे. वाहतूक व्यवस्थेत कार्बन उत्सर्जन कमी करण्यासाठी आम्ही करत असलेल्या प्रयत्नांचा हा गौरव आहे. सार्वजनिक वाहतुकीत विद्युत बसेसचा गतीने समावेश करुन स्वच्छ आणि शाश्वत दळणवळणाला प्रोत्साहन देण्यासाठी आम्ही कटीबद्ध आहोत. ई-बसेसचा आमचा हा उपक्रम इतर शहरांनाही मार्गदर्शक आणि प्रेरक ठरु शकेल अशा स्वरुपाचे मॉडेल तयार करण्यासाठी आम्ही प्रयत्न करत आहोत.’

विक्रम कुमार, आयुक्त, पुणे महानगरपालिका