पुणे शहराला पाणीपुरवठा करणाऱ्या धरणा मधील पाणी साठा कमी झाल्याने पुणे महानगरपालिकेने दिनांक ४ ते ११ जुलै दरम्यान एक दिवसा आड पाणी पुरवठय़ाचे वेळापत्रक जाहीर केले होते. तद्नंतर १० तारखेला असलेल्या आषाढी एकादशी आणि  बकरी ईद विचारात घेता दिनांक ८ ते ११ जुलै पर्यंत दररोज पाणी पुरवठा नियमित पणे करण्याचा निर्णय घेण्यात आला होता. आजमितीस चारही धरणा मधील पाणी साठा विचारात घेता दिनांक ११ जुलै पासून दिनांक २६ जुलैपर्यंत दररोज पाणी पुरवठा करण्यात येणार आहे. दिनांक २६  जुलै नंतर पाणी  वाटपा बाबतचा निर्णय त्या वेळेच्या धरणांमधील असलेल्या पाणी साठ्याचा विचार करून घेण्यात येऊन तो अलाहिदा कळवण्यात येईल, असे अनिरुद्ध पावसकर  मुख्य अभियंता  (पाणीपुरवठा), यांनी कळवले आहे.

दरम्यान शहराला पाणी पुरवठा करणाऱ्या खडकवासला साखळीतील 4 धरणामध्ये 7.74 tmc पाणी जमा झाले आहे. मागील वर्षी याच दिवसात 8.66 tmc पाणी होते. धरण क्षेत्रात गेल्या आठवड्यापासून संततधार सुरु आहे. त्यामुळे धरणामध्ये दररोज 1 टीएमसी पाण्याची वाढ होत आहे. या पावसामुळे पुणेकरांनी मोकळा श्वास घेतला आहे.