Teachers Day 2023 | आपला सर्वात मोठा शिक्षक कोण ! कुणाकडून शिकत राहायला हवंय आपण?
Teachers Day 2023 | )Author: Ganesh Mule) | आपण शिकत असतो. शिकत राहतो आयुष्यभर. काही ना काही. कधी शिकवणाराकडून शिकतो. कधी त्याने न शिकवता देखील त्याचे अनुकरण शिकत राहतो. Mentor कुणाला लाभतो. कुणाला लाभत नाही. कुणाला तो मिळत नाही, म्हणून त्याने लगेच निराश होण्याचे कारण नाही. शिकणं ही प्रेरणा आहे. चिकाटीनं शिकत राहायला हवंय. (Teachers Day 2023)
आपण लोकांकडून बरंच काही शिकत असतो. त्यांच्या यशामधून. अपयशामधून. त्यातून आपलं एक व्यक्तिमत्व बनवत असतो. हे करत असताना आपण नेहमी एका गोष्टीकडे दुर्लक्ष करत असतो. आपण आपल्या आयुष्याकडून फार काही शिकत नाही. आपलं आयुष्य आपल्याला खूप काही शिकवण्याचा प्रयत्न करत असतं. शिकवत असतं. पण आपल्याला त्याच्याकडून शिकायचं नसतं. कारण ते अवघड आहे. आपल्याला आयत्या ज्ञानाची सवय झालीय. लोकांकडून शिकायला आपल्याला बरं वाटतं. समोरचा ज्ञान देत असतो. आपण घेत राहतो. मात्र आपल्याच आयुष्याच्या शिकवण्याकडे आपण दुर्लक्ष करतो. ते आपल्याला सांगत असतं; तुला नेमकं काय हवंय. पण आपली ऐकण्याची तयारी नसते. आपण आपल्यासाठी दुसऱ्यानी बनवलेल्या नियमांचा आधार घेत जगत असतो. त्यामुळेच आपल्यातला ‘खरा मी’ आपल्याला लवकर सापडत नाही. कुणाला सापडतो. बऱ्याच जणांना नाही सापडत. (National Teachers Day)
इतर कुठल्याही शिक्षकांपेक्षा आपलं आयुष्य हा आपला सर्वात मोठा शिक्षक असतो. त्याच्याकडून आपण शिकत राहायला हवंय. आपण थांबल्यावर आपल्याला ढकलत असतं. त्याचे संकेत ओळखायला हवेत. खूप सारे अनुभव देतं आपलं आयुष्य आपल्याला.! आपण त्याच्याकडून काही शिकत नसलो कि आपल्याला अधून मधून झटके देत राहतं. आपली कसोटी घेत असतं आयुष्य. कुणी हरतात. त्यामुळे मग कुणी सोडून देतात. मात्र काही जण चिकाटीचे असतात. त्याच्यावर स्वार होतात. कसोटी कितीही कठीण असली तरी ती पार करतात. आयुष्याकडून शिकत आपलं आयुष्य घडवतात. आपल्या आयुष्याकडून शिकत राहा. तो आपला मित्र आहे. एक आदर्श शिक्षक आहे. चांगला mentor आहे. लोकांकडून तर शिकाच. पण आपल्याच आयुष्याकडून भरपूर शिका. (Teachers Day Significance)
——
News Title | Teachers Day 2023 | Who is your greatest teacher! Who do you want to learn from?