पुणे : स्थायी समितीचे माजी अध्यक्ष हेमंत रासने यांनी महापालिका आयुक्तांच्या विरोधात उच्च न्यायालयात याचिका दाखल केली होती. स्थायी समिती बरखास्त होत नाही, असा मुद्दा रासने यांनी मांडला होता. मात्र न्यायालयाने याचिका फेटाळून लावली आहे. यावरून राष्ट्रवादीचे प्रदेश प्रवक्ता अंकुश काकडे यांनी रासने यांना टोला लगावला आहे. शेवटी हेमंत रासने यांची हौस फिटली, असा शाब्दिक टोला काकडे यांनी लगावला आहे. तसेच चंद्रकांत पाटील यांनाही काकडे यांनी टोला लगावला आहे.

काकडे म्हणाले, स्थायी समितीचे माजी अध्यक्ष श्री हेमंत रासने यांनी अट्टाहासाने, स्थायी समिती रद्द होत नाही, यासाठी उच्च न्यायालयामध्ये याचिका दाखल केली होती. परंतु उच्च न्यायालयाने ही याचिका फेटाळून लावली. त्यामुळे विनाकारण महानगरपालिकेला विधी खात्याला जो खर्च झाला त्याला जबाबदार कोण ? शेवटी  रासने यांची आपली हौस फिटली, पण महानगरपालिकेला मात्र आर्थिक बोजा पडला त्याला जबाबदार कोण? पण शेवटी हेमंत रासने यांची हौस फिटली असेच म्हणावे लागेल. चंद्रकांत दादा अतिशय चांगले अभ्यासू अध्यक्ष आपण पुणे महानगर पालिकेला दिले त्याबद्दल आपले देखील मनःपूर्वक अभिनंदन.