Katraj Zoo Online Ticket | पुणे | महापालिकेचे राजीव गांधी प्राणिसंग्रहालय आणि वन्यजीव संशोधन केंद्र (Rajiv Gandhi Zoological Park and Wildlife Research Center) अर्थात कात्रज झू पाहण्यासाठी नागरिकांची मोठ्या प्रमाणात गर्दी होत असते. यामुळे कधी कधी नागरिकांना तिकिटासाठी तासनतास रांगेत उभे राहावे लागत होते. हे टाळण्यासाठी पुणे महापालिकेने (Pune Municipal Corporation) प्राणी संग्रहालयासाठी स्वतंत्र पोर्टल (Katraj Zoo Portal) सुरु केले आहे. या माध्यमातून नागरिक आता घरबसल्या ऑनलाईन तिकीट काढू शकतात. या प्रणालीचे आजच अतिरिक्त आयुक्त विकास ढाकणे (Additional Commissioner Vikas Dhakane) यांच्या हस्ते उदघाटन करण्यात आले. अशी माहिती उद्यान अधिक्षक अशोक घोरपडे (Garden Superintendent Ashok Ghorpade) यांनी दिली.

कात्रज परिसरात पुणे महापालिकेच्या (PMC Pune) वतीने राजीव गांधी प्राणिसंग्रहालय आणि वन्यजीव संशोधन केंद्र निर्माण केले आहे. वाघ, सिंह, चित्ता, कोल्हा पासून ते सर्व प्रकारचे पक्षी, प्राणी, साप या संग्रहालयात आपल्याला पाहायला मिळतात. हे पाहण्यासाठी महाराष्ट्र भरातून लोक येत असतात. यात शाळांच्या सहलीचे प्रमाण देखील असते. शनिवार, रविवार किंवा इतर सुट्टीच्या दिवशी झू मध्ये मोठ्या प्रमाणात गर्दी होते. जवळपास 10 हजार नागरिक एका दिवशी भेट देतात. महापालिकेने तिकिटाचे काउंटर देखील वाढवले होते. तरीही नागरिकांना तिकिटासाठी बराच काळ रांगेत उभे राहावे लागते. याबाबत तक्रारी देखील येत होत्या. त्यामुळे याबाबत प्रशासनाने पुढाकार घेत तिकीटाची प्रणाली ऑनलाईन करण्याचा निर्णय घेतला. त्यानुसार स्वतंत्र पोर्टल चे काम पूर्ण करण्यात आले असून त्याचे आज उदघाटन झाले.

घोरपडे यांनी सांगितले कि, दरम्यान ही प्रणाली ऑनलाईन झाली असली तरी तिकिटाचे दर मात्र पाहिल्यासारखेच असणार आहेत. त्यात कुठलाही बदल नाही. प्रौढ व्यक्तींना 40 रुपये, मुलांना 10 रुपये, परदेशी नागरिकांना 100 रुपये असे तिकिटाचे दर आहेत. तर video कॅमेरा साठी 200 आणि स्टील कॅमेरा साठी 50 रुपये असा दर आहे.

दरम्यान या ऑनलाईन प्रणालीचे काम Stark Digital Media Services Pvt. Ltd या कंपनीकडून करण्यात आले आहे. असे प्रशासनाकडून सांगण्यात आले.

—-

ऑनलाईन प्रणालीमुळे नागरिकांना सोयी सुविधा उपलब्ध होणार आहेत. पूर्वी नागरिकांचा रांगेत वेळ जात होता, तो वेळ आता वाचणार आहे. त्यामुळे  नागरिकांनी आता या सेवेचा जास्तीत जास्त लाभ घ्यावा.