Tag: efile

पुणे : महापालिकेचे कामकाज अधिक कार्यक्षम, प्रभावी आणि पारदर्शक करण्यासाठी पुणे महानगरपालिकेमध्ये सर्व खात्यांमध्ये आता ई-ऑफिस (eFile) संगणकप्रणालीची अंमलबजावणी करण्यात येणार आहे. त्यासाठी सर्व खात्याकडून माहिती मागवण्यात आली आहे. याबाबतचे आदेश अतिरिक्त आयुक्त रवींद्र बिनवडे यांनी जारी केले आहेत.

महाराष्ट्र शासनाकडील ई-ऑफिस हा प्रकल्प ई-गव्हर्नन्स कार्यक्रमांतर्गत आहे. प्रशासकीय कामकाजाचे दृष्टीकोनातून ई-ऑफिस (eFile) संगणकप्रणालीचा वापर करणे आवश्यक आहे. तदनुषंगाने, पुणे महानगरपालिकेमध्ये महाराष्ट्र शासनाकडील ई-ऑफिस (eFile) संगणकप्रणाली अंमलबजावणी करणेचे प्रयोजन आहे. ई-ऑफिस (eFile) अंमलबजावणीचा उद्देश व उद्दिष्ट, हे शासकीय कामकाज अधिक कार्यक्षम, प्रभावी आणि पारदर्शक करणे हे आहे. पुणे महानगरपालिकेमध्ये सर्व खात्यांमध्ये ई-ऑफिस (eFile) संगणकप्रणालीची अंमलबजावणी करण्यात येणार आहे. तरी, पुणे महानगरपालिकेतील सर्व विभागांनी ई-ऑफिस (eFile) संगणकप्रणाली अंमलबजावणीकरिता आवश्यक असलेली सर्व माहिती हि माहिती व तंत्रज्ञान विभागाकडे ५ दिवसाच्या आत पाठविण्यात यावी. असे अतिरिक्त आयुक्तांनी आपल्या आदेशात म्हटले आहे. या माहितीमध्ये महापालिका कर्मचाऱ्यांची सगळी माहिती तसेच कार्यालयामध्ये असणारे संगणक, प्रिंटर, लॅपटॉप, स्कॅनर आदींची देखील माहिती मागवण्यात आली आहे.