Tag: Ganesh bidkar
संस्कृती बिघडवत असल्याचा आरोप म्हणजे या शतकातील महान विनोद!
गणेश बिडकर यांनी घेतला प्रशांत जगताप यांचा समाचार
पुणे : भारतीय जनता पार्टीचे प्रदेशाध्यक्ष चंद्रकांतदादा पाटील पुण्याची संस्कृती बिघडवत असल्याचा आरोप राष्ट्रवादी काँग्रेसचे शहराध्यक्ष प्रशांत जगताप यांनी केला आहे. राष्ट्रवादीच्या नेत्याने भाजपाच्या नेत्यावर संस्कृती बिघडवत असल्याचा आरोप करणे, हा या शतकातील महान विनोद आहे. कोरोनामुळे मानसिक ताण अनेकांवर आलेला आहे, परंतु तो जगताप यांच्यावर अधिकच आलेला दिसतो, अशा शब्दात सभागृह नेते गणेश बिडकर यांनी जगताप यांचा समाचार घेतला.
जगताप यांना अत्यंत परिश्रमानंतर, प्रतीक्षेनंतर पक्षाच्या शहराध्यक्षपदाची वस्त्रे देण्यात आली आहेत. सुसंस्कृततेच्या नावाने बोंब असलेल्या पक्षाचे ते प्रतिनिधित्व करीत आहेत, त्यामुळे चांगले काय बोलायचे, हे त्यांना उमजत नसल्याने विरोधकांवर बेलगाम आरोप करीत ते आपल्या पक्षाच्या संस्कृतीशी इमान राखत आहेत, असे बिडकर म्हणाले.
राष्ट्रवादीचे दोन विद्यमान लोकप्रतिनिधी ‘मोका’ कायद्याखाली तुरुंगाची हवा खाऊन आलेले
महाराष्ट्रातच नव्हे, तर देशातही राजकारणी आणि गुन्हेगार संबंध असा विषय पुढे आल्यावर एकमुखाने कोणाचे नाव पुढे येते, याचा उच्चार करण्याची गरज नाही. गुन्हेगारांचे राजकारण्यांशी संबंध हा विषय काय, हे महाराष्ट्राचे माजी मुख्यमंत्री सुधाकरराव नाईक खूप चांगल्या पद्धतीने समजावून सांगत. त्यांच्या समकालीन नेत्यांशी बोलल्यास जगताप यांना खूप तपशिलाने माहिती मिळेल. नरसिंह राव पंतप्रधान असताना ‘व्होरा समिती’ने गुन्हेगार आणि राजकारणी संबंध यावर अहवाल तयार केला होता, तोही प्रशांत जगताप यांनी नजरेखालून घालावा. पुण्याचाच विचार करायचा तर राष्ट्रवादीचे दोन विद्यमान लोकप्रतिनिधी ‘मोका’ कायद्याखाली तुरुंगाची हवा खाऊन आलेले आहेत. यातील एकाचे तर मार्गदर्शन सकाळ-संध्याकाळ जगताप घेत आहेत. त्यांना रोज बरोबर घेऊन फिरताना जगताप यांना कोणता संत्संग घडतो आहे, असा सवाल सभागृह नेते बिडकर यांनी विचारला आहे. जगताप यांच्या पक्षाचे गृहमंत्री या राज्याला लाभले होते, ते अनिल देशमुख १०० कोटींच्या वसुलीच्या प्रकरणानंतर फरार आहेत. त्यांच्याविषयी जगतापांना काहीच बोलायचे नाही का? आपला पक्ष जनतेच्या मनातील सर्वात भ्रष्ट, गुंडांचा अशी प्रतिमा असताना जगताप जेव्हा संस्कृतीच्या गोष्टी करतात, तेव्हा त्यांच्या आत्मविश्वासाचे कौतुक करावेसे वाटते.
महिलांना समान संधी देण्यात राष्ट्रवादी अग्रेसर असल्याचा दावा केला जातो, पण दोन महिला चंद्रकांतदादांना आमदारकीची दोन वर्षे पूर्ण केल्याच्या निमित्ताने सदिच्छा द्यायला आल्याबरोबर त्या महिलांच्या बदनामीची मोहीम जगताप उघडतात, हे त्यांच्यातील पोकळ समतावादी दृष्टिकोनाचे दर्शन आहे. या महिलांचे भाऊ, पती काय करतात यावरून त्यांना बदनाम करणे, हा त्या महिलांवरील अन्याय आहे. या युगात महिलांना स्वतःची मते आहेत, स्वातंत्र्य आहे. असे असताना महिलांना केवळ त्यांच्या नातलग पुरुषांच्या प्रतिमेवरून जोखणे, हे महापौर राहिलेल्या जगताप यांना शोभत नाही. या महिलांना नव्याने काही सुरुवात करायची असेल, तर संधी नाकारणारे जगताप कोण? यातून जगताप यांचा महिलांप्रतिचा संकुचित दृष्टिकोन अधोरेखित होतो आहे. आधार देणारा, ज्याच्याकडे विश्वासाने जावे, अशा सहृदयी व्यक्तीला प्रेमाने ‘दादा’ या नावाने संबोधले जाते. चंद्रकांतदादांमधील दादा हा सहृदयी व्यक्तिमत्त्वाचा दादा आहे. अन्यथा पुण्यातील जनतेला ‘दादा’ नावाची ओळख काय होती, हे तुम्हीच अधिक अधिकारवाणीने सांगू शकतात, असा टोला देखील बिडकर यांनी लगावला आहे.
मध्यवर्ती भागालाही उपनगरा प्रमाणे ‘स्मार्ट’ करणार
: सभागृह नेता गणेश बिडकर यांचे आश्वासन
पुणे : शहरातील मध्यवस्तीचा भाग असलेल्या सोमवार पेठ, मंगळवार पेठेत आवश्यक त्या सोयी सुविधा देत या भागाचा चेहरा मोहरा बदलणार आहे. अशी ग्वाही महनगरपालिकेतील सभागृह नेते गणेश बिडकर यांनी शुक्रवारी दिली. या भागात केला जाणारा ‘स्मार्ट प्रभाग – स्मार्ट रास्ता’ हा त्याचाच एक भाग असल्याचे त्यांनी सांगितले. शिवाय उपनगराच्या धर्तीवर मध्यवर्ती भागालाही स्मार्ट करणार, असे ही बिडकर यांनी सांगितले.
: सोमवार पेठ, मंगळवार पेठ परिसरात विविध विकासकामांचा शुभारंभ
सभागृह नेते बिडकर यांच्या वाढदिवसाचे औचित्य साधून शुक्रवारी सोमवार पेठ, मंगळवार पेठ परिसरात विविध विकासकामांचा शुभारंभ करण्यात आला. कॅन्टोन्मेंट विधानसभा मतदार संघाचे आमदार सुनील कांबळे यांच्यासह पालिकेलेचे नगरसेवक, पक्षाचे पदाधिकारी या भागातील नागरिक विविध क्षेत्रातील मान्यवर मंडळी यावेळी मोठ्या संख्येने उपस्थित होते. या भागातील नागरिकाच्या सोयीसाठी या परिसरात आवश्यक असलेली पावसाळी गटारांची लाईन टाकणे, ड्रेनेज लाईन टाकणे तसेच खोदण्यात आलेल्या रस्त्यांची दुरुस्ती करणे ही कामे प्रामुख्याने केली जाणार आहेत.
मध्यवस्तीचा भाग असलेल्या सोमवार पेठ, मंगळवार पेठेतील रस्ते अरुंद आहेत. या भागातून अनेक ठिकाणी ये जा करणे सोयीचे असल्याने मोठ्या प्रमाणात वाहन चालक या रस्त्यांचा वापर करतात. हा भाग वर्दळीचा असल्याने येथे नवीन रस्ते बांधले जात नाही. या रस्त्यांच्या देखभाल आणि दुरुस्तीची कामे केवळ केली जातात. शहराची उपनगरे असलेल्या भागातील प्रशस्त आणि नागरिकांना चालण्यासाठी उपयुक्त असलेले रस्ते पाहिल्यानंतर असे रस्ते या भागात का होऊ शकत नाही, असा प्रश्न विचारला जातो. शहरातील इतर भागांमध्ये असलेले रस्ते या ठिकाणी व्हावेत यासाठी कटिबद्ध असल्याचे सभागृह नेते बिडकर यांनी सांगितले. या प्रभागातील नागरिकांना पायाभूत सुविधा पुरविण्यासाठी आवश्यक तो निधी उपलब्ध करण्यासाठी प्रयत्नशील असून पुढील काही महिन्यांमध्ये या भागात नवीन बदल पाहायला मिळाल्याशिवाय राहणार नाही, अशी ग्वाही त्यांनी यावेळी दिली.
सभागृह नेते बिडकर यांच्या वाढदिवसाचे औचित्य साधून आयुष्यमान भारत योजनेच्या अंतर्गत नागरिकांना आरोग्य कार्डचे वाटप देखील करण्यात आले. तसेच विविध स्पर्धांचे बक्षिस वितरण कार्यक्रम देखील यावेळी करण्यात आला. बिडकर यांच्या कामाचे कौतुक करून त्यांना शुभेच्छा देण्यासाठी त्यांच्या जनसंपर्क कार्यालयात सकाळपासूनच मोठी गर्दी झाली होती. शहरातील सामाजिक, राजकीय, शैक्षणिक, शासकीय अधिकारी यासह विविध क्षेत्रातील मान्यवरांनी त्यांना शुभेच्छा देत त्यांच्या कामाचे कौतुक केले.
पुणेकरांनी साडेचार वर्षांपूर्वी ज्या विश्वासाने भारतीय जनता पक्षाला (भाजप) महानगरपालिकेत एकहाती सत्ता दिली. त्यांचा विश्वास सार्थ करताना सत्ताधारी म्हणून भाजपने शहरात अनेक महत्वाचे प्रकल्प मार्गी लावले आहेत. सोमवार, मंगळवार पेठेसह प्रत्येक प्रभागातील रस्ता स्मार्ट करण्याचा आमचा प्रयत्न आहे.
– गणेश बिडकर, सभागृह नेते, पुणे महानगरपालिका
सभागृह नेते गणेश बिडकर यांच्या वाढदिवसानिमित्त
: सोमवार पेठ, रास्ता पेठ परिसरात विविध विकास कामांच्या कार्यक्रमांचे आयोजन
पुणे : महानगरपालिकेचे सभागृह नेते गणेश बिडकर यांच्या वाढदिवसानिमित्त सोमवार पेठ, रास्ता पेठ परिसरात विविध विकास कामांच्या कार्यक्रमांचे आयोजन करण्यात आले आहे. शुक्रवारी २२ ऑक्टोबरला सकाळी दहा ते बारा यावेळेत हे कार्यक्रम होणार आहेत. प्रभागातील रस्ता अर्बन स्ट्रीट गाईडलाईन्स नुसार विकसित करणे, पावसाळी लाईन, ड्रेनेजलाईन टाकणे, आयुष्यमान भारत योजनेच्या अंतर्गत नागरिकांना आरोग्य कार्डचे वाटप करणे असे कार्यक्रम होणार आहेत.
: सत्ताधारी म्हणून अनेक महत्वाचे प्रकल्प मार्गी लावले
महानगरपालिकेत सभागृह नेते म्हणून जबाबदारी स्वीकारल्यानंतर गेल्या दहा महिन्यांमध्ये सभागृह नेते बिडकर यांनी अनेक विकास कामांचे प्रस्ताव मार्गी लावले आहेत. शहरातील अनेक भागातील अर्धवट असलेली कामे पूर्ण करण्याबरोबरच पुणेकरांना फायदेशीर ठरणाऱ्या प्रकल्पांच्या कामासाठी आवश्यकतेनुसार निधी उपलब्ध करुन देण्यासाठी बिडकर यांनी पुढाकार घेतला आहे. पाच वर्षांपूर्वी ज्या विश्वासाने पुणेकरांनी भारतीय जनता पक्षाला (भाजप) महानगरपालिकेत एकहाती सत्ता दिली. त्यांचा विश्वास सार्थ ठरविताना भाजपने सत्ताधारी म्हणून अनेक महत्वाचे प्रकल्प मार्गी लावले असल्याचा दावा भाजपकडून केला जात आहे.
सोमवार पेठ, रास्ता पेठ तसेच मंगळवार पेठेतील नागरिकांच्या सोयीसाठी सभागृह नेते बिडकर यांच्या वाढदिवसाचे औचित्य साधून या भागात ‘स्मार्ट प्रभाग – स्मार्ट रस्ता’ संकल्पना राबविली जाणार आहे. १५ ऑगस्ट चौक ते नरपतगिरी चौक या मुख्य रस्ता खोदून त्याचे काँक्रीटीकरण केले जाणार आहे. सोमवार पेठ नागेश चौकातील मुख्य रस्ता खोदाई करून तेथे पावसाळी लाईनटाकणे, ड्रेनेज लाईन टाकणे या कामाची सुरुवात होणार आहे. तसेच आयुष्यमान भारत योजनेअंतर्गत नागरिकांना आरोग्य कार्ड तसेच तुळशीचे रोप वाटप केले जाणार आहे. सोमवार पेठेतील जनसंपर्क कार्यालयात हा कार्यक्रम होईल.