Tag: Murlidhar mohol

Muralidhar Mohol : ‘त्या’ कुटुंबियांना महापौरांकडून अनोखा ‘आधार’ : ५ हजार कुटुंबियांना दिला गेला फराळ

Categories
cultural PMC पुणे

‘त्या’ कुटुंबियांना महापौरांकडून अनोखा ‘आधार’

– कोरोनाने दगावलेल्या व्यक्तींच्या घरी जाऊन फराळ

– ५ हजार कुटुंबियांना दिला गेला फराळ

पुणे : कोरोनामुळे कुटूंबातील सदस्याचा मृत्यू झाल्याने हिंदू रीतिरिवाजानुसार वर्षभर कोणताही सण साजरा केला जात नाही. मात्र दिवाळीचा सण ‘तम सोमा ज्योतिर्गमय’प्रमाणे अंधाराकडून प्रकाशाकडे जाणारा असतो. हाच धागा लक्षात घेता आणि दुःखात असलेल्या कुटुंबियांना फराळ आणि संदेशपत्र घरपोच करुन आधार देण्याचा प्रयत्न महापौर मुरलीधर मोहोळ यांनी केला आहे. शहरात गेल्या वर्षभरात कोरोनाग्रस्त मृत्यूची संख्या जवळपास ५ हजारांच्या आसपास आहे, या सर्व कुटूंबियांना महापौर मोहोळ यांनी आधार दिला.

कोरोनामुळे गेल्या वर्षी मृत्यू झालेल्या जवळपास साडेचार हजार नागरिकांच्या कुटूंबियांना फराळ देऊन कुटूंबियांना आधार देण्याचा प्रयत्न केला होता. यंदाही जवळपास पाच हजार कुटूंबियांना हा आधार देण्याचा प्रयत्न महापौर मोहोळ यांच्याकडून केला गेला आहे.

याबाबत माहिती देताना महापौर मोहोळ म्हणाले, गेल्या दीड-पावणे दोन वर्षात जवळपास साडेनऊ हजार कुटूंबियांच्या घरी दुःखाचे सावट होते. ज्यांनी कुटूंबियांतील सदस्य गमावले, त्यांचे दुःख कमी होणारे नसले तरी अशा कुटूंबियांना आधार देणे आवश्यक होते. म्हणूनच त्यांना आधार देण्याच्या प्रयत्नाचा भाग म्हणून संदेशपत्र आणि फराळ पोहोचवत आहोत.’

‘आपल्या हिंदू संस्कृतीत कुटूंबियांतील सदस्य गमावल्यास जवळपास वर्षभर सण साजरा केला जात नाही. मात्र कोरोनाच्या संकटकाळात एकूणच नकारात्मक वातावरणात निर्माण होते. या पार्श्वभूमीवर दुःखाचा डोंगर मागे सारून नवी पहाट अशा कुटूंबियांमध्ये आणणे आवश्यक होते. त्या दृष्टीने प्रयत्न म्हणून कुटूंबियांचा आधार देण्याचा प्रयत्न केला. मी स्वतः काही कुटूंबियांकडे जाऊन आधार देण्याचा प्रयत्न केला असून संपूर्ण पाच हजार कुटूंबियांमध्ये फराळ पोहोच करण्यात येत आहे’, असेही महापौर म्हणाले.

Prashant jagtap vs BJP : संस्कृत पुण्यात महापौरांसह भाजप पदाधिकाऱ्यांची संघटित गुंडगिरी : राष्ट्रवादी शहर अध्यक्ष प्रशांत जगताप यांचा पुन्हा हमला 

Categories
PMC Political पुणे

संस्कृत पुण्यात महापौरांसह भाजप पदाधिकाऱ्यांची संघटित गुंडगिरी

: राष्ट्रवादी शहर अध्यक्ष प्रशांत जगताप यांचा पुन्हा हमला

पुणे : पुणे महानगरपालिकेतील सत्ताधारी भाजप गुंडांसोबत वावरण्याचेच काम करीत नाहीत, तर या पक्षाचे प्रमुख पदाधिकारी प्रत्यक्ष गुंडगिरी करायला लावून संघटित गुन्हेगारीत सहभागी होत आहेत, हे शुक्रवारी एका प्रकरणात समोर आले आहे. विशेष म्हणजे, पुण्यनगरीचे प्रथम नागरिक अशा प्रतिष्ठेचे पद असलेल्या महापौरांचाही या संघटित गुन्हेगारीत समावेश असल्याचे उघड होत आहे. ही पुणेकर म्हणून नक्कीच शरमेने मान खाली घालायला लावणारी घटना आहे. ज्या गुंड सदा ढावरेच्या माध्यमातून ही संघटित गुन्हेगारी करण्यात येत होती, त्या सदा ढावरेला गेल्या आठ दिवसांपासून कुणाकुणाचे फोन आले होते, यात आणखी कोण सहभागी आहे, हे तपासण्यासाठी ढावरेचा ‘सीडीआर’ काढण्यात यावा, अशी मागणी राष्ट्रवादी काँग्रेसतर्फे शनिवारी मा. पोलिस आयुक्तांकडे करण्यात येणार आहे. अशी महिती राष्ट्रवादी कॉंग्रेस चे शहर अध्यक्ष प्रशांत जगताप यांनी दिली.

: सत्य फार काळ लपून राहात नाही : जगताप

प्रशांत जगताप म्हणाले, भाजपचे  प्रदेशाध्यक्ष व कोथरूडचे आमदार चंद्रकांत पाटील यांच्या उपस्थितीतील कार्यक्रमात गुन्हेगारी पार्श्वभूमी असलेल्या काहीजणांचा भाजप प्रवेश करण्याचा प्रयत्न बुधवारी फसला. परंतु, सुसंस्कृत अशी बिरुदावली मिरवणाऱ्या भाजपचा खरा चेहरा उघड करणाऱ्या या घटनेचे वार्तांकन प्रसारमाध्यमांतून प्रसिद्ध झाल्यानंतर भाजपची झोप उडाली आहे. त्यावर सभागृहनेते गणेश बीडकर व भाजपचे प्रवक्ते संदीप खर्डेकर यांनी पत्रकार परिषद घेऊन भाजपची व चंद्रकांत पाटील यांची बाजू सावरण्याचा केविलवाणा प्रयत्न केला. परंतु, त्यात ते पूर्णपणे उघडे पडले आणि माझ्यावर व माझा पक्ष राष्ट्रवादी काँग्रेसवर बिनबुडाचे आरोप करण्याचा प्रयत्न केला. खरे तर आपले आणखी काही उघड होऊ नये म्हणून अशी ही धडपड बीडकर यांच्याकडून सुरू होती. परंतु, सत्य फार काळ लपून राहात नाही, हे पुन्हा एकदा सिद्ध झाले असून, भाजपच्या पदाधिकाऱ्यांचे दोन कारनामे नव्याने उघड झाले आहेत.

जगताप म्हणाले, माझ्या वानवडी प्रभागातील भाजपचे नगरसेवक धनराज घोगरे यांनी मारहाण केल्याची व धमकावल्याची तक्रार एका ठेकेदाराने केली आहे. यात अधिक चौकशी केली असता, हे प्रकरण तेवढ्यापुरतेच मर्यादित नसून, ही संघटित गुन्हेगारी असल्याचे समोर आले आहे. घोगरे यांनी पैशांच्या बदल्यात ठेकेदाराला काम देण्याचे कबूल केले होते. परंतु, कामही दिले नाही आणि घेतलेले पैसेही दिले नाहीत. उलट पैसे मागणाऱ्या ठेकेदाराला मारहाण केल्याची तक्रार ठेकेदाराने १५ दिवसांपूर्वी पोलिस स्टेशनला दिली आहे. ही तक्रार दाखल करून वारंवार पाठपुरावा केल्यानंतर अखेर घोगरेंविरोधात आरोपपत्र दाखल झाले. त्यानंतर फिर्यादीला वारंवार धमक्या देण्यात आल्या. इतकेच नव्हे, तर महापौर मुरलीधर मोहोळ यांनी हे प्रकरण मिटविण्यासाठी भाजप नगरसेविका अर्चनाताई पाटील यांचे पती तुषार पाटील यांना फोन केला. त्यानुसार, तुषार पाटील यांनी त्यांच्याच पक्षातील गुंड सदा ढावरेला सांगून फिर्यादीला उचलण्याचे आदेश दिले. तुषार पाटील यांच्या सांगण्यावरून सदा ढावरेने फिर्यादीचे अपहरण करून त्याला कोर्टात घेऊन गेले व मारहाण झाली नसल्याचे, तक्रार नसल्याचे प्रतिज्ञापत्र करण्यात आले. फिर्यादीला थेट उचलून नेल्याने त्याच्याकडे पॅनकार्ड, आधारकार्ड असे काहीही कागदपत्र नव्हते. या प्रकरणाचे गांभीर्य ओळखून फिर्यादीने प्रतिज्ञापत्रावर खोटी सही केली व लघुशंकेचे निमित्त करून तेथून पळ काढला. फिर्यादीने थेट दत्तवाडी पोलिस स्टेशन गाठले आणि आरोपींविरोधात तक्रार दाखल केली. या वेळी संपूर्ण घटनाक्रम ऐकल्यानंतर पोलिसांनी गुंड सदा ढावरेला अटक केली. सदा ढावरेच्या चौकशीत त्याने तुषार पाटील यांनी सांगितल्यानुसार अपहरण केल्याचे सांगितले. पोलिस निरीक्षकांनी तुषार पाटील यांना फोन केल्यानंतर त्यांनी महापौरांनी सांगितल्यानुसार सदा ढावरेला अपहरण करायला सांगितले, असा जबाब दिला आहे. त्यानुसार, सदा ढावरे व तुषार पाटील यांच्यावर गुन्हा दाखल झाला आहे.

या प्रकरणाचा थेट संबंध महापौरांपर्यंत येऊन ठेपला आहे. परंतु, महापौरपद हे सन्माननीय पद असल्याने त्यांच्यावर गुन्हा दाखल करावा, अशी मागणी आम्ही करणार नाही. मात्र, भाजपचे शहराध्यक्ष, प्रदेशाध्यक्ष, सभागृहनेत्यांनी या प्रकरणी खुलासा करावा, अशी मागणी आम्ही करीत आहोत. तसेच, ही घटना गंभीर असल्याने गेल्या १५ दिवसांपासून सदा ढावरेला कुणाकुणाचे फोन येत होते, हे तपासण्यासाठी ढावरेचा ‘सीडीआर’ काढण्यात यावा, अशी मागणी पोलिस आयुक्तांना करणार आहोत. असे ही जगताप म्हणाले.

Politics : चंद्रकांतदादांवर उठसुठ आरोप करणे हा प्रशांत जगतापांचा धंदा झालाय !  : महापौर मुरलीधर मोहोळ यांनी जगतापांना सुनावले 

Categories
PMC Political पुणे

चंद्रकांतदादांवर उठसुठ आरोप करणे हा प्रशांत जगतापांचा धंदा झालाय !

: महापौर मुरलीधर मोहोळ यांनी जगतापांना सुनावले

पुणे: गेले दोन दिवस भाजप आणि राष्ट्रवादीचे प्रशांत जगताप यांच्यात चांगलाच वाद पाहायला मिळतो आहे. राष्ट्रवादीचे शहर अध्यक्ष प्रशांत जगताप यांनी चंद्रकांत पाटील यांच्यासोबत महापौर आणि सभागृह नेते यांना देखील आरोपीच्या पिंजऱ्यात उभे केले आहे. यावर महापौर मुरलीधर मोहोळ यांनी जगतापांना चांगलेच सुनावले. महापौर म्हणाले चंद्रकांतदादांवर उठसुठ आरोप करणे हा प्रशांत जगतापांचा धंदा झालाय. पण आता त्यांनी वैयक्तिक पातळीवरील टीका थांबवावी. तसे नाही झाले तर आम्हाला देखील वैयक्तिक पातळीवर यावे लागेल. असा इशारा महापौरांनी दिला आहे.

: आम्ही देखील विसरू पुण्याची राजकीय संस्कृती

महापौर म्हणाले, वैयक्तिक पातळीवर जाऊन आरोप करणे ही पुण्याची राजकीय संस्कृती नाही. तरीही जगताप असे आरोप करत असतील तर ते चुकीचे आहे. आम्हाला देखील मग राजकीय संस्कृती विसरावी लागेल. जगतापांनी शहराच्या हितावर बोलावे. आणि दोषी लोकांना सजा देण्याचे काम पोलिसांचे आहे. जगतापांनी त्यात पडू नये. महापौर पुढे म्हणाले, चंद्रकांत दादासारख्या माणसावर आरोप करताना जगतापांनी भान ठेवावे. तुमचे जेवढे वय नाही, तेवढा सामाजिक आणि राजकीय अनुभव त्यांना आहे. आम्ही जगतापांना फार गांभीर्याने घेत नाही. मात्र आता त्यांनी थांबावे. अन्यथा जगतापांना त्याची किंमत मोजावी लागेल.

: विरोधी पक्ष नेत्यांच्या पतीने जेलची हवा खाल्ली : बिडकर

दरम्यान सभागृह नेते गणेश बिडकर यांनी देखील राष्ट्रवादीचा समाचार घेतला. बिडकर म्हणाले राष्ट्रवादीचा एक विद्यमान नगरसेवक नुकतीच जेलची हवा खाऊन आला आहे. तर विरोधी पक्ष नेत्या यांचे पती बाबा धुमाळ देखील शिक्षण मंडळाचे अध्यक्ष असताना जेलची हवा खाऊन आले आहेत. बिडकर पुढे म्हणाले, तपास करण्यासाठी यंत्रणा आहेत. तपासामध्ये काही तथ्य असल्यास न्याय यंत्रणा आहे. आमचा न्याय व्यवस्थेवर पूर्ण विश्वास असून आवश्यक त्या चौकशीसाठी तयार आहोत. राष्ट्रवादी काँग्रेसचे शहराध्यक्ष प्रशांत जगताप हे वकीली का करत आहेत? हेच समजत नाही.

Medical College : वैद्यकीय महाविद्यालयाच्या अंतिम मंजुरीत तांत्रिक अडचण ; महापौर दिल्लीत

Categories
PMC आरोग्य देश/विदेश पुणे

वैद्यकीय महाविद्यालयाच्या अंतिम मंजुरीत तांत्रिक अडचण ; महापौर दिल्लीत

– महापौर मुरलीधर मोहोळ यांची केंद्रीय आरोग्य मंत्र्यांशी सकारात्मक चर्चा

पुणे : महापालिकेच्या भारतरत्न अटल बिहारी वाजपेयी वैद्यकीय महाविद्यालयाच्या अंतिम मंजुरीत काही तांत्रिक निर्माण झाल्याचे एनएमसीचे म्हणणे होते. या पार्श्वभूमीवर महापौर मुरलीधर मोहोळ यांनी केंद्रीय आरोग्य मंत्री मनसुख मांडवीय यांची नवी दिल्लीतील आरोग्य मंत्रालयात भेट घेऊन चर्चा केली. विरोधीपक्ष नेते देवेंद्र फडणवीस यांच्या पुढाकाराने ही भेट झाली. या भेटीत सकारात्मक चर्चा झाली असून अंतिम मंजुरीसंदर्भात लवकरच सकारात्मक निर्णय होणार आहे.

लवकरच सुरु होणार महाविद्यालय

वैद्यकीय महाविद्यालयाने आजवर मंजुरीसंदर्भातील सर्व टप्पे पार केले असून प्राथमिक मंजुरी देण्यात आली आहे. मात्र अंतिम मंजुरीत काही तांत्रिक अडचण निर्माण झाली होती. त्या पार्श्वभूमीवर मोहोळ यांनी तातडीने भेट घेऊ तांत्रिक अडचण सोडवण्यासंदर्भातील नियोजन केंद्रीय आरोग्य मंत्री मांडवीय यांच्याकडे दिले. त्यावर मांडवीय यांनीही सकारात्मकता दाखवली आहे.

याबाबत माहिती देताना महापौर मोहोळ म्हणाले, ‘अंतिम मंजुरीसाठी आवश्यक त्या सर्व बाबी पूर्ण केल्या असून सर्व वैद्यकीय महाविद्यालय सुरु करण्यासाठीची सर्व यंत्रणा सज्ज आहे. मात्र अंतिम मंजुरीत काही तांत्रिक मुद्दे उपस्थित झाल्याने त्याबाबत सविस्तर चर्चा केंद्रीय आरोग्य मंत्री मांडवीय यांच्याशी केली आहे. माझ्या स्थायी समितीच्या अध्यक्षपदाच्या कार्यकाळात या संकल्पनेपासून तर अंतिम मंजुरीच्या टप्प्यापर्यंत देवेंद्र फडणवीस यांची मोलाची भूमिका राहिलेली आहे. त्याबद्दल त्यांचे पुणेकरांच्या वतीने धन्यवाद व्यक्त करतो’.

PMC : प्लॉगेथॉन : ५२१ ठिकाणी ५७,२२७ किलो कचरा संकलित

Categories
PMC social पुणे

प्लॉगेथॉन : ५२१ ठिकाणी ५७,२२७ किलो कचरा संकलित

– ५५ हजारांपेक्षा जास्त पुणेकरांनी नोंदवला सहभाग

पुणे : चालता-चालता कचरा गोळा करणे या उद्देशाने राबवलेल्या पुणे महापौर प्लॉगेथॉन या मोहिमेच्या निमित्ताने पुणेकर एकवटल्याचे चित्र रविवारी संपूर्ण पुणे शहरात पाहायला मिळाले. शहराच्या विविध ५२१ ठिकाणी राबविण्यात आलेल्या या मोहिमेत ५५ हजार २२७ पुणेकरांनी सहभाग नोंदवत तब्बल ५७ हजार ५६९ किलो प्लास्टिक आणि इतर सुका कचरा संकलित करण्यात आला.

उपक्रमाची सुरवात सायकल रॅलीद्वारे

स्वच्छ भारत अभियान अंतर्गत ‘पुणे महापौर प्लॉगेथॉन २०२१’चे आयोजन करण्यात आले होते. व्यक्तिगत आरोग्य उत्तम राखण्यासाठी हजारोजण सकाळी जॉगिंग करतात. या जॉगिंगला कचरा संकलनाची जोड दिल्यास समाजासाठीही काही केल्याचे समाधान या जॉगर्सना लाभू शकेल या महापौर मुरलीधर मोहोळ यांच्या संकल्पनेस हे आयोजन करण्यात आले होते. या उपक्रमाची सुरवात सायकल रॅलीद्वारे करण्यात आली. पुणे मनपा भवन मुख्य इमारत या ठिकाणी महापौर मोहोळ यांच्या हस्ते सायकल रॅलीचा फ्लॅग ऑफ करण्यात आला. यावेळी सभागृह नेते गणेश बिडकर, महापालिका आयुक्त विक्रम कुमार, सावित्रीबाई फुले पुणे विद्यापीठाचे कुलगुरू डॉ. नितीन करमळकर, अतिरिक्त आयुक्त डॉ. कुणाल खेमनार, ज्ञानेश्वर मोळक यांच्यासह ३५० सायकलपटू सहभागी होते. कोथरूडच्या कर्वेपुतळा येथे महापौर मोहोळ यांच्यासह भाजप प्रदेशाध्यक्ष आ. चंद्रकांत पाटील यांनी सहभाग नोंदवत ‘चला प्लॉगिंग करुया पुण्याला स्वच्छ ठेवूया’ हा नारा दिला. महापलिका घनकचरा विभागाचे प्रमुख अजित देशमुख यांची या नियोजनात महत्वाची भूमिका होती.

‘प्लॉगेथॉन मोहिमेत पुणेकर नागरिकांनी ज्याप्रमाणे मोठ्या संख्येने एकजूटीने शहर स्वच्छतेसाठी पुढाकार घेतला आहे, त्याचे फलित म्हणून पुणे शहराला स्वच्छ भारत अभियान अंतर्गत स्वच्छ सर्वेक्षण २०२२ स्पर्धेमध्ये नक्कीच अव्वल मानांकन मिळेल. पुणेकर एकत्र आले तर विधायक कामे किती सहजपणे आणि कमी वेळात होऊ शकतात, याचा वस्तुपाठ पुणेकरांच्या सहभागाने घालून दिला आहे. जागतिक पातळीवर प्लॉगेथॉनची संकल्पना नवीन असताना पुणे शहराने दोन वेळा ही मोहीम यशस्वी करुन दाखवली त्याबद्दल पुणेकरांचे धन्यवाद मानावे तितके कमी आहेत. सहभागी पुणेकरांचे मनःपूर्वक आभार मानतो, असे महापौर मोहोळ यांनी सांगितले.

शहराच्या १५ क्षेत्रिय कार्यालयांतर्गत एकूण ३५ हजार २१६ नागरिकांनी आपापल्या रहिवासी भागांत या प्लॉगेथॉनमध्ये सहभाग घेत स्वच्छता केली. यामध्ये लोकप्रतिनिधी, स्थानिक नगरसेवक, नागरिक, स्वयंसेवी संस्थांचे प्रतिनिधी, बचत गट सदस्य यांचा सहभाग होता. शहरातील विविध स्वयंसेवी संस्थांनी २५ ठिकाणी प्लॉगिंग उपक्रम राबविला. तसेच शहरातील एकूण ३११ मनपा आणि खाजगी शाळांच्या परिसरातदेखील याचप्रमाणे प्लॉगेथॉन ड्राईव्ह घेण्यात आला. यामध्ये एकूण १६ हजार ४१२ शिक्षक, विद्यार्थी व पालक सहभागी झाले. याचबरोबर शहरातील ४४ उद्यानांमध्ये देखील हास्य क्लबचे सदस्य, दैनंदिन वॉकसाठी येणारे नागरिक असे एकूण ३ हजार २४९ नागरिकांनी उद्यानांमध्ये प्लॉगेथॉन ड्राईव्ह राबविला.

भिडे पूल परिसरातील नदी पात्रात एकत्र येऊन महापौर मोहोळ यांनी ‘माझी वसुंधरा’ ही स्वच्छतेची शपथ घेऊन या संपूर्ण उपक्रमाचा शेवट करण्यात आला. यावेळी आमदार मुक्ता टिळक, स्थायीचे अध्यक्ष हेमंत रासने, आयुक्त विक्रम कुमार, कुलगुरू डॉ. करमळकर यांच्यासह मान्यवर सहभागी झाले.

plogethon : pune : प्लॉगेथॉन २०२१ : मेगा ड्राईव्ह’ सुरू

Categories
PMC पुणे

प्लॉगेथॉन २०२१ : मेगा ड्राईव्ह’ सुरू

– मुख्य ९८ रस्ते, १७८ उद्यानात आयोजन

 

पुणे : पुणे शहरात २०१९ साली प्लॉगेथॉनचे यशस्वी आयोजन केल्यानंतर यंदाच्या वर्षी प्लॉगेथोनचे आयोजन करण्यात आले असून आज हा मेगा ड्राईव्ह सुरु झाला आहे.

 

याविषयी माहिती देताना महापौर मोहोळ म्हणाले, ‘प्लॉगथॉनची संकल्पना देशभरात सर्वात आधी पुणे शहरात राबविली होती. ज्यात एक लाखापेक्षा जास्त पुणेकरांनी सहभाग नोंदवत स्वच्छ पुण्यासाठी मोठा हातभार लावला होता. यंदा ९८ मुख्य रस्ते आणि १७८ उद्यानात आयोजन करण्यात आले असून मनपा आणि खाजगी अशा मिळून ५०० शाळा सहभागी झाल्या आहेत.’

 

‘यंदाचा मेगा ड्राईव्ह यशस्वी करण्यासाठी योग्य त्या सूचना सर्व घटकांना दिल्या असून प्लॉगेथॉनचा उपक्रम राबवताना सुक्ष्म पध्दतीने नियोजन करणे, वॉर्ड स्तरावरही बारकाईने नियोजन करणे, पुणेकरांमध्ये जागरूकता निर्माण करणे, नागरिकांचा सहभाग वाढवणे, प्रभावशाली व्यक्तिमत्वांना मोहिमेत सहभागी करुन घेणे आदी विषयावर काम करण्यात येत आहे, असेहीमहापौर मोहोळ म्हणाले.