दिव्यांग कर्मचारी आणि नागरिकांशी सलोख्याने वागा
| अन्यथा कर्मचाऱ्यांवर होणार प्रशासकीय कार्यवाही
अतिरिक्त आयुक्त यांच्या निर्देशानुसार भारतीय संविधानाने सर्व नागरिकांसाठी सर्वसमावेशक समाज ज्यामध्ये दिव्यांग व्यक्ती ह्या अशा समाजाचा अभिन्न अंग असेल अशा समाजाची निर्मिती करणे बंधनकारक केलेले आहे. त्यानुषंगाने दिव्यांग व्यक्तींचे सक्षमीकरणासाठी केंद्र शासनाने दिव्यांग व्यक्ती अधिनियम २०१६ मंजूर करून लागू केलेला आहे. त्यानुषंगाने महाराष्ट्र शासनाने देखील ‘दिव्यांग व्यक्तींसाठीचे महाराष्ट्र राज्याचे दिव्यांग धोरण, २०१८’ मंजूर केलेले आहे. धोरणामध्ये दिव्यांग व्यक्तींचे अधिकार व त्यांचेबाबत शासन / प्राधिकरण यांनी करावयाची कार्यवाही याबाबत विविध सूचना निर्गमित केलेल्या आहेत.
पुणे महानगरपालिकेच्या विविध कार्यालयांमध्ये दिव्यांग अधिकारी व कर्मचारी कार्यरत आहेत. पुणे
महानगरपालिका सेवा विनियमातील “नगरपालिका कर्मचाऱ्यांचे वर्तणूक नियम” क्र. २७ मध्ये ‘नगरपालिका
कर्मचाऱ्याने आपल्याहून वरिष्ठ वा कनिष्ठ असलेल्या सहकाऱ्यांसकट सर्वांशी व त्याचबरोबर जनतेशी त्याने
सौजन्याने वागले पाहिजे’, असे निर्देश आहेत. पुणे महानगरपालिकेच्या सर्व कार्यालयांमध्ये कार्यरत अधिकारी आणि कर्मचाऱ्यांनी कार्यालयामध्ये कार्यरत असलेले दिव्यांग अधिकारी व कर्मचारी तसेच शासकीय कामासाठी कार्यालयामध्ये येणारे दिव्यांग नागरिक यांचेशी कार्यालयीन कामकाज पार पाडताना सलोख्याचे, सौजन्याचे, सौहार्दतेचे व एकोप्याचे वर्तन ठेवावे.
—