Loksabha Election Voting | अत्यावश्यक सेवेतील अधिकारी कर्मचाऱ्यांनी टपाली मतदान करावे – जिल्हाधिकारी डॉ. सुहास दिवसे

Loksabha Election Voting – (The Karbhari News Service) –  भारत निवडणूक आयोगाच्या (Election commission of India) – सूचनेनुसार लोकसभा सार्वत्रिक निवडणुकीच्या वेळेस अधिसूचित अत्यावश्यक सेवेतील अधिकारी, कर्मचाऱ्यांसाठी टपाली मतदानाची सुविधा उपलब्ध करुन देण्यात आली असून विहीत मुदतीत नमुना १२ डी सादर केलेल्या अधिकारी, कर्मचाऱ्यांनी या सुविधेचा लाभ घ्यावा, असे आवाहन जिल्हा निवडणूक अधिकारी तथा जिल्हाधिकारी डॉ. सुहास दिवसे यांनी केले आहे. (Dr Suhas Diwase IAS)

टपाली मतदानाचा नमुना १२ डी चा अर्ज सादर केलेल्या अत्यावश्यक सेवेतील कर्मचाऱ्यांना मतदान करण्यासाठी सर्व सहायक निवडणूक निर्णय अधिकाऱ्यांच्या कार्यालयात टपाली मतदान सुविधा केंद्र (पीव्हीसी) स्थापन करण्यात येणार आहेत. त्या ठिकाणी जाऊन संबधित अधिकारी, कर्मचाऱ्यांनी टपाली मतदान करावे.

टपाली मतदान केंद्रे (पीव्हीसी) संबंधित सहायक निवडणूक निर्णय अधिकारी यांच्या कार्यालयात कार्यरत राहतील. ३५ बारामती लोकसभा मतदार संघात १ ते ३ मे रोजी सकाळी ९ वाजेपासून ते सायं. ५ वाजेपर्यंत, ३३ मावळ लोकसभा मतदार संघ, ३४ पुणे लोकसभा मतदार संघ व ३६ शिरूर लोकसभा मतदार संघात ७ ते ९ मे रोजी सकाळी ९ वाजेपासून ते सायं. ५ वाजेपर्यंत टपाली मतदान केंद्रे कार्यरत राहतील, असेही जिल्हा निवडणूक कार्यालयाकडून कळविण्यात आले आहे.