लोकविश्वास प्रतिष्ठान या गोव्यातील संस्थेच्या दिव्यांग मुलांनी (Lokvishwas Pratishthans Divyang Students) पुणेकरांसाठी गीत रामायणावर आधारित महानाट्य सादर करण्याचे ठरवले होते. त्यानुसार या महानाट्याचा पहिला प्रयोग शुक्रवार ९ फेब्रुवारी रोजी सिम्बॉयसिस ईशान्य भवन कॅम्पस, सिम्बॉयसिस स्कूल, म्हाडा कॉलनी, विमान नगर, पुणे येथे झाला.  तर दुसरा प्रयोग रविवार ११ फेब्रुवारी रोजी दुपारी कोथरूड पुणे येथील यशवंतराव चव्हाण नाटयगृहात (Yashwantrao Chavan Natyagruh Pune) पार पडला.  लोकविश्वास प्रतिष्ठानचे अध्यक्ष अनुप प्रियोळकर,  सचिव सविता देसाई (Savita Desai), प्राचार्य अरविंद मोरे (Arvind More Principal) आणि त्यांच्या इतर शिक्षक सहकाऱ्यांनी घेतलेल्या अथक मेहनतीने ही शानदार मैफल पुणेकरांना अनुभवायला मिळाली.

सन २०२० मध्ये बाबूजी व गदिमांची जन्मशताब्दी होती. त्या जन्मशताब्दीच्या निमित्ताने लोकविश्वास प्रतिष्ठानच्या मुलांनी गोव्यात एका कार्यक्रमात गीतरामायणाच्या माध्यमातून त्यांना आदरांजली वाहिली होती. हा कार्यक्रम काही पुणेकरांनी बघितला होता, त्यावेळी त्यांनी हा कार्यक्रम पुण्यात व्हावा असा आग्रह धरला होता. पुणेकरांच्या आग्रहाखातर या महानाट्याचे प्रयोग पुण्यात आयोजित करण्यात आले होते. या महानाट्यात सुमारे दोनशे अंध, दिव्यांग विद्यार्थी, विद्यार्थीनी सहभागी झाले होते. या दोन्ही कार्यक्रमास  पुणेकरांनी मोठा प्रतिसाद देऊन मुलांचा उत्साह चांगलाच वाढवला.