Tag: Dr Siddharth Dhene

Dr Siddharth Dhende | दुकानदारांकडून धान्य विक्रीतील काळा बाजार न थांबल्यास उपोषण करू | पुणे महापालिकेचे माजी उपमहापौर डॉ. सिद्धार्थ धेंडे यांचा इशारा

Categories
Breaking News Political social पुणे

Dr Siddharth Dhende | दुकानदारांकडून धान्य विक्रीतील काळा बाजार न थांबल्यास उपोषण करू

| पुणे महापालिकेचे माजी उपमहापौर डॉ. सिद्धार्थ धेंडे यांचा इशारा

| मुख्य अन्न धान्य वितरण अधिकाऱ्यांना निवेदन

Dr Siddharth Dhende | स्वस्त धान्य दुकानदारांकडून शिधापत्रिकाधारकांना धान्याचे पुरेसे वाटप करावे. धान्य वाटपातील काळा बाजार थांबवावा. अन्यथा अन्न धान्य वितरण व पुरवठा कार्यालयाच्या पुणे कार्यालयासमोर नागरिकांसह तीव्र आंदोलन आणि उपोषण छेडू असा इशारा पुणे महापालिकेचे माजी उपमहापौर डॉ. सिद्धार्थ धेंडे यांनी दिला. तसेच दुकानदारांना चुकीच्या कामात अभय देणाऱ्या शिधापत्रिका कार्यालयाच्या अधिकाऱ्यांवर कारवाई करा, अशी मागणी डॉ. धेंडे यांनी मुख्य अन्न धान्य वितरण अधिकाऱ्यांना निवेदनात केली.

डॉ. धेंडे यांनी दिलेल्या निवेदनात नमूद केले की, पुणे शहरातील शिधा वाटप केंद्रामार्फत धान्याचे पुरेसे वाटप केले जात नाही. नागरिकांकडून सातत्याने अशा तक्रारी येत आहेत. शिधापत्रिका कार्यालयाच्या येरवड्यातील ई विभाग अंतर्गत नागपूर चाळ आणि हाऊसिंग बोर्ड या ठिकाणी चार स्वस्त धान्य वितरणाचे दुकान आहे. या दुकानांपैकी सर्व दुकानांमधून शासन मार्फत प्रति युनिट येणारे धान्य नागरिकांपर्यंत पोहचत नाही. ही वस्तुस्थिती आहे. तसेच आपल्या संबंधीत अधिकाऱ्यांच्या संगनमताने हे चालू असल्याचे लक्षात येत आहे. या संबंधीत अधिकारी व दुकानदाराची चौकशी करून अन्नधान्याचा काळाबाजार व भ्रष्टाचार होत असेल तर त्यांच्यावर त्वरित कार्यवाही करावी, अशी मागणी करण्यात आली.

तसेच स्वस्त धान्य दुकानाला शासनामार्फत होणारा पुरवठा व दुकानदाराकडून होणारे वितरण यांची माहिती दर्शनीय भागात लावावी. नागरिकांना धान्य वितरीत केल्यानंतर पावती मिळत नाही. जर एका घरात पाच व्यक्ती असतील तर त्यांना दोनच व्यक्तीचे धान्य दिले जात असल्याच्या नागरिकांच्या तक्रारी आहेत. इतर व्यक्तीचे धान्य काळ्या बाजाराने विकले जात आहे. तरी यावर लवकरात लवकर कार्यवाही करून सर्व नागरिकांना माहिती मिळावी. तसेच नागरिकांना पुरेसे धान्य देण्यात यावे.

अन्यथा कार्यालयासमोर गरिबांच्या न्याय हक्कासाठी आंदोलन व उपोषण करू, असा इशारा डॉ. धेंडे यांनी निवेदनाद्वारे दिला.
———————————–

 

Dr Siddharth Dhende | प्रभाग दोन मधील अवैध धंद्यांना बसणार चाप

Categories
Breaking News social पुणे

Dr Siddharth Dhende | प्रभाग दोन मधील अवैध धंद्यांना बसणार चाप

| कारवाई करण्याचे डॉ. सिद्धार्थ धेंडे यांचे पोलिस निरिक्षकांना निवेदन

| येरवडा पोलिस प्रशासनाचे कारवाईचे आश्वासन

 

Dr Siddharth Dhende | पुणे महापालिकेच्या (Pune Municipal corporation) प्रभाग क्रमांक दोन (Ward no 2) मधील अवैध धंद्यांना आता चाप बसणार आहे. अवैध धंद्यांवर कारवाई करा, अन्यथा तीव्र आंदोलन करणार असल्याचा इशारा पुणे महापालिकेचे माजी उपमहापौर डॉ. सिद्धार्थ धेंडे (Dr Siddharth Dhende) यांनी येरवडा पोलिस स्टेशनला दिलेल्या निवेदनात दिला. त्याची दखल घेत अवैध धंद्यांवर कारवाई करण्याचे आश्वासन येरवडा पोलिस स्टेशनचे वरिष्ठ पोलिस निरिक्षक बाळकृष्ण कदम यांनी डॉ. धेंडे यांना दिले आहे.

डॉ. धेंडे यांनी दिलेल्या निवेदनात नमूद केले आहे की, पुणे महापालिकेच्या प्रभाग क्रमांक दोन मध्ये अवैध धंद्यांना ऊत आला आहे. तरूणाई व्यसनांच्या आहारी गेली आहे. यामध्ये प्रामूख्याने पंचशील नगर, चंद्रमा नगर, जाधव नगर, राजीव गांधीनगर, पाटबंधारे वसाहत, अहिल्या सोसायटी, करुणा सोसायटी, आंबेडकर कॉलनी परिसरातील नागरिकांनी सातत्याने तक्रारींचे गार्‍हाणे मांडले होते. या परिसरात बेकायदेशीर मद्यविक्री (दारु), जुगार, मटका तसेच नशा आणणारे ड्रग्स यांची विक्री होत असल्याचे नागरिक सांगत आहेत. यामुळे या परिसरात सातत्याने हिंसाचाराच्या घटना घडत आहेत. गुंडांकडून परिसरात भिती पसरवली जाण्याचे प्रकार होत आहेत. या घटनेमुळे परिसरातील नागरिक भयभीत झाले आहेत.

भीतीपोटी नागरिक पोलिसांकडे तक्रार करण्याकडे पाठ फिरवत आहेत. लहान मुले व तरुणाई व्यसनांना बळी पडत आहेत. नशेच्या आहारी गेल्यामुळे एक पिढी वाया जात असल्याचे चित्र आहे. स्थानिक पातळीवर वारंवार वाद होणे. महिलांना व जेष्ठांना असुरक्षेतेची भावना निर्माण झालेली आहे. या बेकायदेशीर व्यवसाय करणार्‍यांना काही जण आर्थिक व राजकीय पाठबळ देत असल्याच्या तक्रारी नागरिक करत आहेत. या तक्रारींची दखल घेऊन अवैध धंदे करणार्‍यांवर तसेच गुंडांवर जरब बसवावे, अशी मागणी डॉ. धेंडे यांनी निवेदनाद्वारे केली. अन्यथा नागरिकांसह तीव्र आंदोलन छेडण्याचा इशारा दिला आहे.

या बाबत त्वरीत कार्यवाही करून अवैध धंदा करणार्‍यांवर कारवाई करू, असे आश्वासन पोलिस निरिक्षक कदम यांनी दिले असल्याची माहिती डॉ. धेंडे यांनी दिली.
——————-
डिसेंबर रोजी वॉर्ड सभेचे आयोजन* –

प्रभाग क्रमांक दोन मध्ये डॉ. सिद्धार्थ धेंडे यांच्या पुढाकाराने वॉर्ड सभेचे आयोजन करण्यात आले आहे. या सभेला येरवडा पोलिस स्टेशनचे वरिष्ठ अधिकारी, कर्मचारी, पुणे महापालिकेच्या प्रभाग कार्यालयाचे अधिकारी, विद्युत विभागाचे अधिकारी उपस्थित राहणार आहेत. यामध्ये प्रभागातील विद्युतच्या अडचणी, खराब रस्ते, चौकांची झालेली दुरवस्था, अवैध धंडे आदीसह विविध विषयांवर चर्चा करण्यात येणार आहे. त्यावर त्वरीत योग्य तोडगा काढण्यासाठी चर्चा होणार आहे.
———————-

प्रभागात अवैध धंदे करणार्‍यांची संख्या वाढली आहे. तरूणाई व्यसनांच्या आहारी गेली आहे. त्यामुळे परिसरात भांडणे, हिंसाचाराच्या घटना घडत आहेत. या बाबत नागरिकांनी माझ्याकडे तक्रारी केल्या. त्याची दखल घेत मी निवेदन दिले आहे. अवैध धंदे बंद करून संबंधीतांवर कारवाईची मागणी केली आहे. त्याची कार्यवाही न झाल्यास नागरिकांसह तीव्र आंदोलन छेडणार आहे.

– डॉ. सिद्धार्थ धेंडे, माजी उपमहापौर, पुणे महापालिका
—————————-

Pune Airport Road | एअरपोर्ट रस्त्यावरून होणार विना अडथळा प्रवास | सम्राट अशोक चौक, येरवडा पोस्ट कार्यालय येथे सिग्नल कार्यान्वीत

Categories
Breaking News PMC Political social पुणे

Pune Airport Road | एअरपोर्ट रस्त्यावरून होणार विना अडथळा प्रवास | सम्राट अशोक चौक, येरवडा पोस्ट कार्यालय येथे सिग्नल कार्यान्वीत

| माजी उपमहापौर डॉ. सिद्धार्थ धेंडे यांच्या मागणीला यश

 

Pune Airport Road | व्हीआयपी लोकांसह सर्वसामान्यांसाठी महत्त्वाचा असणार्‍या एअरपोर्ट रस्त्यावरून आता विना वाहतूकीचा अडथळा प्रवास करता येणार आहे. या रस्त्यादरम्यान असणार्‍या येरवडा पोस्ट कार्यालयाजवळील सम्राट अशोक चौक येथे सिग्नल यंत्रणा बुधवारी (दि. 1) कार्यान्वीत करण्यात आली आहे. त्यामुळे बेशिस्त वाहतूकीची समस्या उद्धभवणार नाही. सातत्याने होणार्‍या वाहतूक कोंडीचा देखील सामना वाहनधारकांना करावा लागणार नाही. पुणे महापालिकेचे (Pune Municipal Corporation) माजी उपमहापौर डॉ. सिद्धार्थ धेंडे  (Dr Siddharth Dhende) यांनी या बाबत पाठपुरावा केला होता. त्याला अखेर यश आले आहे. (Pune News)

प्रभाग क्रमांक दोन अंतर्गत एअरपोर्ट रस्त्याचा समावेश होतो. या रस्त्यावरून सातत्याने अति महत्त्वाचे अधिकारी, मंत्री यांचा प्रवास होतो. त्यांना वाहतूकीचा अडथळा होऊ नये यासाठी वाहतूक शाखेच्या वतीने सातत्याने खबरदारी घेतली जाते. महत्त्वाच्या व्यक्तींच्या दौर्‍यावेळी खबरदारी म्हणून या रस्त्यादरम्यान उभी असलेली वाहने, अडथळे दूर करण्यात येतात. नुकतीच पुणे येथे जी – 20 परिषदेच्या काही बैठकाही पार पडल्या. या वेळी राष्ट्रीय प्रतिनिधींच्या वाहनांचा ताफा या रस्त्यावरून जात होता. या दरम्यान सम्राट अशोक चौक, येरवडा पोस्ट येथे सातत्याने वाहतूक कोंडीचा सामना करावा लागत होता. या चौकात सिग्नलची व्यवस्था नसल्याने तसेच चौक मोठा असल्याने वाहतूकीला अडथळे येत होते.

या चौकातून विश्रांतवाडी, शिवाजीनगर, शास्त्रीनगर, एअरपोर्ट आदी भागाकडे जाणारी वाहनांची मोठी रहदारी असते. त्यामुळे वाहतूकीला शिस्त लागणे आवश्यक होते. सिग्नलअभावी अनेक वेळा अपघाताच्या देखील शक्यता निर्माण झाल्या होत्या. त्याची दखल घेत पुणे महापालिकेच्या संबंधीत विभागाकडे सिग्नल बसवावा, यासाठी डॉ. धेंडे यांनी पाठपुरावा केला होता. त्यांनी केलेल्या पाठपुराव्याला यश आले. महापालिका अधिकार्‍यांच्या सूचनेनुसार कर्मचार्‍यांनी सम्राट अशोक चौक, येरवडा पोस्ट येथे वाहतूक सिग्नल बसविण्याची कार्यवाही केली.

पुणे महापालिका विद्युत विभागाचे प्रमुख श्रीनिवास कंदुल आणि स्मार्ट सिटीचे विद्युत प्रमूख बोरसे यांनी यासाठी सूचना दिल्याची माहिती डॉ. धेंडे यांनी केली. सिग्नल सुरू झाल्यामुळे वाहनधारकांना होणार्‍या त्रासातून मुक्तता मिळणार आहे. वाहतूक व्यवस्था देखील सुरळीत राहणार आहे.

———

जी 20 परिषदेच्या काही बैठका पुणे येथे झाल्या होत्या. या वेळी राष्ट्रीय प्रतिनिधी विमानतळावरून या मार्गावरूनच कार्यक्रमाच्या ठिकाणी जात होते. या वेळी वाहतूक कोंडीचा काही वेळ अडथळा निर्माण झाला होता. या पार्श्वभूमीवर मी स्वतः आयुक्तांना पत्र देऊन सम्राट अशोक चौक येथे सिग्नलची व्यवस्था करून वाहतूक कोंडी टाळावी, अशी मागणी केली होती. त्या मागणीला यश आल्याचे समाधान आहे. तसेच बदामी चौकातून एअरपोर्ट रस्त्याकडे जाणार्‍या वाहनांची संख्याही अधिक आहे. त्याचाही अडथळा होऊ नये, यासाठी सम्राट अशोक चौकाच्या सिग्नलशी सुसंगत सिग्नल बदामी चौकात देखील सुरू करण्याची मागणी केली आहे. त्या बाबतही सकारात्मक कार्यवाही होणार असल्याचे अधिकार्‍यांनी सांगितले आहे.

– डॉ. सिद्धार्थ धेंडे, माजी उपमहापौर, पुणे महापालिका

Bhide Wada Smarak High Court | उच्च न्यायालयाचा निर्णय म्हणजे सावित्रीबाई फुलेंना मानवंदना : डॉ. सिद्धार्थ धेंडे

Categories
Breaking News Political social पुणे

Bhide Wada Smarak High Court | उच्च न्यायालयाचा निर्णय म्हणजे सावित्रीबाई फुलेंना मानवंदना : डॉ. सिद्धार्थ धेंडे

– भिडेवाडा राष्ट्रीय स्मारक होण्याचा मार्ग मोकळा ; पुणे महापालिकेकडे हस्तांतरणाचा न्यायालयाचा निर्णय

 

Bhide Wada Smarak High Court | भिडे वाडा राष्ट्रीय स्मारक (Bhide wada National Memorial) होण्याचा अंतिम मार्ग मोकळा झाला आहे. भिडे वाड्याचे पुणे महापालिकेकडे (pune Municipal Corporation) हस्तांतरण करण्याचा निर्णय उच्च  न्यायालयाने (High Court) दिला आहे. असंख्य सामाजिक संघटना, नेत्यांनी दिलेल्या लढ्याचे हे यश आहे. न्यायालयाचा हा निर्णय म्हणजे नवरात्री मध्ये सावित्रीबाई फुलेंना (Savitribai Phule)  खऱ्या अर्थाने दिलेली मानवंदना आहे, अशी भावना पुणे महापालिकेचे माजी उपमहापौर डॉ. सिद्धार्थ धेंडे (Dr Siddharth Dhende) यांनी व्यक्त केली. (Bhide Wada National Memorial High Court)

महात्मा जोतिबा फुले आणि सावित्रीबाई फुले यांनी भिडेवाडा येथे देशातील मुलींची पहिली शाळा सुरू केली. ही वास्तू सामाजिक, ऐतिहासिकदृष्ट्या अत्यंत महत्त्वाची आहे ; मात्र त्या वास्तूचे योग्य प्रकारे जतन होत नसल्याची तक्रार होती. त्याचे जतन करून राष्ट्रीय स्मारक करा, अशी मागणी सामाजिक संघटना करत आहेत. सामाजिक संघटनांच्या दबावामुळे मुख्यमंत्री एकनाथ शिंदे सरकारने स्मारकासाठी 50 कोटींची तरतूद केली होती. मात्र काही तांत्रिक अडथळ्यांमुळे प्रत्यक्ष स्मारक उभारले न्हवते. (Pune Bhide Wada News)

भिडे वाडा महापालिकेकडे हस्तांतरण करावे यासाठी न्यायालयीन प्रक्रियेत हे प्रकरण प्रलंबित होते. विविध सामाजिक संस्था संघटना रिपब्लिकन पार्टी ऑफ इंडिया आठवले गट यासाठी लढा देत होते. त्या लढ्याला अखेर यश आले आहे. उच्च न्यायालयाने भिडे वाडा पुणे महापालिकेकडे हस्तांतरण करण्याचा निर्णय दिला आहे. त्यामुळे या ठिकाणी ज्ञानार्जनाला अभिप्रेत असणारे राष्ट्रीय स्मारक उभारण्याचा मार्ग आता मोकळा झाला आहे. सध्या नवरात्र उत्सव सुरू आहे ज्यांच्यामुळे स्त्रियांना मुख्य प्रवाहात आणण्याचे काम झाले आहे. त्या सावित्रीबाई फुलेंना या निर्णयामुळे मानवंदना मिळाली असल्याचे डॉ. धेंडे म्हणाले. (Bhide Wada Smarak Pune)
—————————

रिपाइच्या वतीने पेढे वाटून आनंदोत्सव –

भिडे वाडा राष्ट्रीय स्मारक होण्यासाठी आरपीआयच्या वतीने लढा देण्यात आला. त्यामुळे उच्च न्यायालयाने दिलेल्या निर्णयाचे रिपब्लिकन पार्टी ऑफ इंडिया आठवले गटाच्या वतीने स्वागत करण्यात येणार आहे. भिडे वाडा येथे पक्षाचे पदाधिकारी, कार्यकर्ते यांनी उपस्थित राहून पेढे वाटून आनंद साजरा केला.