पुणे | भवन रचना विभागातील टेंडरप्रक्रिया माहिती अधिकार कायद्याचा दुरुपयोग करून प्रशासनाला वेठीस धरणारे कार्यकर्ते, काही राजकीय पदाधिकारी यांच्या मुळे बेसुमार लांबणीवर जात आहे. असा आरोप काँग्रेस शहर अध्यक्ष अरविंद शिंदे यांनी केला आहे. तसेच नियमात बसणारी टेंडर प्रक्रिया रद्द करू नये. अशी मागणी शिंदे यांनी महापालिका आयुक्त विक्रम कुमार यांच्याकडे केली आहे.

    शिंदे यांनी आयुक्तांना दिलेल्या निवेदनानुसार काही ठेकेदार रिंग पद्धतीने काम मिळवण्यासाठी अश्या स्वयं घोषित समाजसेवकांना सुपारी देतात. असे समाजसेवक मर्जीतल्या हितसंबंधी ठेकेदारास काम न मिळाल्यास जबाबदार लोकप्रतिनिधी चे कडून टेंडर प्रक्रिया रद्द करून फेर टेंडर काढण्याची मागणी करतात. या गोंधळात विकासकामे अकारण लांबतात ही वस्तुस्थिती आहे . मनपाच्या प्रचलित पद्धतीने दक्षता विभागाच्या देखरेखीखाली निविदा प्रक्रिया राबविणे ही मनपाच्या आर्थिक हिताची बाब असून कोणत्याही परिस्थितीत राजकीय पदाधिकाऱ्यांच्या व स्वयंघोषित समाजसेवकांच्या दबावाखाली नियम अटी मध्ये बसणारी रीतसर टेंडर प्रक्रिया रद्दबातल करू नये.

            या प्रकरणी कायदेशीर बाबी यांचे पालन करणाऱ्या निविदाआर्थिक संगनमताने  रद्द केल्यास लोकशाही मार्गाने तीव्र आंदोलन केले जाईल. असे शिंदे यांनी म्हटले आहे.