Tag: PMPML

7th Pay Commission | PMPML | पीएमपी कर्मचाऱ्यांना 100% सातवा वेतन आयोग लागू करा | पीएमटी इंटक संघटनेची मुख्यमंत्र्याकडे मागणी

Categories
Breaking News Commerce PMC Political social पुणे

पीएमपी कर्मचाऱ्यांना 100% सातवा वेतन आयोग लागू करा

| पीएमटी इंटक संघटनेची मुख्यमंत्र्याकडे मागणी

पुणे | पीएमपीएलच्या (PMPML) 10 हजार कर्मचारी आणि अधिकाऱ्यांना अजूनही पूर्णपणे सातव्या वेतन आयोगाचा (7th Pay Commission) लाभ देण्यात आलेला नाही. मागील वर्षी त्यांना 50% सातवा वेतन आयोग लागू करण्यात आला होता. मात्र 100% आयोग लागू करण्याबाबत प्रशासनाची उदासीनता कारणीभूत असल्याचे पीएमटी इंटक संघटनेने म्हटले आहे. तसेच पीएमपी प्रशासन आणि पुणे व पिंपरी मनपाला (PMC, PCMC) त्यांच्या हिस्याचे पैसे देऊन वेतन आयोग लागू करण्याची मागणी संघटनेकडून  करण्यात आली आहे. शिवसेना शहर अध्यक्ष नाना भानगिरे (Nana Bhangire)  यांच्या माध्यमातून मुख्यमंत्री एकनाथ शिंदे (CM Eknath Shinde) यांच्याकडे ही मागणी करण्यात आली आहे.

संघटनेच्या निवेदनानुसार आम्ही मागील २४ महिण्यापासून याबाबत पाठपुरावा करीत आहोत. तरीही २४ महिने उलटून जावून सुध्दा १०० टक्के सातवा वेतन आयोग पीएमपीएमएल कर्मचा-यांना लागू करण्यात आलेला नाही. दोन्ही महानगर पालीकेच्या स्वामित्वाची रक्कम मार्च २०२२–२३ च्या अर्थसंकल्पात सुध्दा लागू करण्यासाठी लागणारी रक्कम व फरकाची रक्कम याची तरतुद करण्यात आलेली आहे. परंतु दोन्ही महानगर पालीकेचे आयुक्त यांनी व सध्याचे प्रशासक यांनी सदरची रक्कम परिवहन महामंडळाला दिलेली नसल्याने सातव्या वेतन आयोगाची अंमलबजावणी न झाल्याने सर्व कामगारामध्ये मोठया प्रमाणात जनक्षोभ वाढलेला आहे. त्यामुळे प्रशासनावर कामगारांची विश्वासार्हता राहिलेली नाही. पिंपरी चिंचवड महानगर पालिकेतील कर्मचाऱ्यांना मागील दोन वर्षापुर्वीच सतवा वेतन आयोग लागू करण्यात आलेला असून फरक सुध्दा देण्यात आलेला आहे. तसेच पुणे महानगर पालिका अधिकारी व कर्मचाऱ्यांना डिसेंबर २०२१ पेड इन जानेवारी २०२२ च्या वेतनात सातवा वेतन आयोग लागू करण्यात आलेला असून माहे मार्च २०२२ पेड इन एप्रिल २०२२ मध्ये फरकाची रक्कम अदा करण्यात आलेली आहे.

पुणे महानगर परिवहन महामंडळ लि. हे पुणे व पिंपरी चिंचवड मनपाचे मुलभूत सुविधेचा एक भाग असून दोन्ही मनपा प्रशासनाने स्वामीत्व स्विकारलेले आहे. त्यामुळे पुणे महानगर परिवहन महामंडळ लि. मधिल सर्व अधिकारी व कर्मचारी यांना सातवा वेतन आयोग लागू करण्यात आलेला नसल्याने तसेच प्रत्येक जीवनावश्यक  वस्तुचे भाव वाढत चाललेले असून महागाईची झळ सर्व कामगारांना व त्यांच्या कुटूंबियांना सोसावी लागत आहे.  तीनवेळा दोन्ही आयुक्तांना तोंडी आदेश देवून सुध्दा मुख्यमंत्री आदेशाचे पालन करीत नसून, आपण दिलेल्या शब्दांचा अनादर करीत आहे. याची खंत परिवहन महामंडळाकडील दहा हजार कर्मचारी व त्यांच्या कुटूंबियांना वाटत आहे.

तरी, आपण राज्याचे पालक व मुख्यमंत्री या नात्याने कल्याणकारी राज्य व पुणे व पिंपरी चिंचवड शहर निर्माण करण्याच्या दृष्टिने मानवतावादी दृष्टिकोन डोळयासमोर ठेवून दोन्ही महानगरपालीकेचे आयुक्त तथा सध्याचे प्रशासक व अध्यक्ष व व्यवस्थापकीय संचालक, यांना आदेश त्वरीत काढून पुणे महानगर परिवहन महामंडळ लि. मधिल सर्व आयोग एप्रिल पेड मे २०२३ चे वेतनात १०० टक्के फरकासह लागु करावा. असे संघटनेकडून म्हटले आहे.
—-
पीएमपीच्या कर्मचाऱ्यांना 50% सातवा वेतन आयोग लागू करण्यात आला आहे. उर्वरित आयोग लागू होण्याची कर्मचारी वाट पाहत आहेत. दोन्ही मनपानी आपल्या हिस्याचा निधी द्यावा आणि 100% वेतन लागू करावा. अशी मागणी आम्ही मुख्यमंत्री यांच्याकडे केली आहे.
– नाना भानगिरे, शहर अध्यक्ष, शिवसेना. 
—-

Rani Bhosale | पीएमपीच्या बसमध्ये देखील महिलांना 50% सवलत द्या | माजी महिला बाल कल्याण अध्यक्ष राणी भोसले यांची मागणी

Categories
Breaking News PMC Political social पुणे

पीएमपीच्या बसमध्ये देखील महिलांना 50% सवलत द्या

| माजी महिला बाल कल्याण अध्यक्ष राणी भोसले यांची मागणी

पुणे | राज्य सरकारने महिला सम्मान योजना अंतर्गत राज्यातील सर्व महिलांना एसटीच्या तिकिटमध्ये 50% सवलत दिली आहे. त्याच धर्तीवर PMPML मधून प्रवास करणाऱ्या महिलांना देखील 50% सवलत द्यावी. अशी मागणी भाजपच्या माजी नगरसेविका तथा माजी महिला बाल कल्याण समितीच्या अध्यक्ष राणी भोसले यांनी महापालिका आयुक्त विक्रम कुमार यांच्याकडे केली आहे.

राज्य सरकारच्या वतीने महिला सम्मान योजना कार्यान्वित करण्यात आली आहे. त्या अंतर्गत महिलांना वेगवेगळ्या सुविधा देण्यात येत आहेत. त्याचाच भाग म्हणून एसटीच्या प्रवासात तिकिटात 50% सवलत देण्यात आली आहे. पुणे शहरात पीएमपी ला पुणे आणि पिंपरी चिंचवड शहराची जीवनदायिनी म्हटले जाते. यामधून खूप महिला प्रवास करत असतात. महिलांसाठी विशेष बस देखील ठेवण्यात आल्या आहेत. तसेच महिन्यातून एकदा मोफत प्रवासाची सुविधा महिलांना दिली जाते. शहरातील महिला प्रवाशाची संख्या पाहता आणि त्यांना सुविधा देण्याच्या दृष्टीने एसटी प्रमाणेच पीएमपी मध्ये देखील सर्व महिला 50% सवलत देण्याची मागणी राणी भोसले यांनी केली आहे. याबाबत महापालिका आयुक्त आणि पीएमपी प्रशासन मिळून काय निर्णय घेणार, याकडे लक्ष लागले आहे.

Property Tax | 40% कर सवलतीबाबत उद्या मुख्यमंत्री घेणार बैठक | PMPML च्या काही विषयांवर देखील होणार चर्चा

Categories
Breaking News cultural PMC पुणे महाराष्ट्र

40% कर सवलतीबाबत उद्या मुख्यमंत्री घेणार बैठक

| PMPML च्या काही विषयांवर देखील होणार चर्चा

पुणे महापालिका हद्दीत मिळकत करात पुणेकरांना देण्यात येणारी ४० टक्के सवलत कायम ठेवावी, अशी मागणी राज्य सरकारकडे सातत्याने करण्यात येत आहे. शिवाय देखभाल दुरुस्ती खर्च १ एप्रिल २०१० पासून १५ टक्क्यांहून १० टक्के फरकाची रक्कम मिळकतींकडून वसूल करण्यात येऊ नये, अशीही मागणी यावेळी करण्यात येत आहे. याबाबत भाजपकडून मागणी करण्यात आली होती. तसेच महाविकास आघाडीकडून आंदोलन करण्यात आले होते. त्यानुसार या दोन्ही मागण्यांसदर्भात उद्या मुख्यमंत्री आणि उपमुख्यमंत्री बैठक घेणार असल्याची माहिती महापालिका प्रशासनाकडून देण्यात  आली.

मिळकत करातील ४०% सवलत दि. १/८/२०१९ पासून स्व: वापर करीत असलेल्या निवासी मिळकतीची काढण्यात येऊ नये आणि देखभाल दुरुस्ती खर्च दि. १/४/२०१० पासून १५% हून १०% फरकाची रक्कम मिळकतींकडून वसूल करण्यात येऊ नये, अशा दोन मागण्या भाजपकडून करण्यात आल्या आहेत.

‘निवासी मिळकतींना देण्यात येणारी ४०% सवलत आणि १५% हून १०% देखभाल दुरुस्ती खर्च नवीन आकारणी होत असलेल्या मिळकतीना दिनांक १/४/२०१९ पासून बंद करण्यात आली आहे. यासंदर्भात २०१९ आणि २०२२ ला महापालिकेच्या मुख्य सभेचा पुन्हा ठराव केला होता. त्याद्वारे हीसवलत रद्द न करता सुरू रहावी, असा ठराव राज्य सरकारकडे पाठवण्याला होता. मात्र  सरकारने कोणाताही निर्णय घेतला नाही’. त्यामुळे महाविकास आघाडीकडून आंदोलन करण्यात आले होते. तसेच पुणेकर नागरिकांकडून देखील मागणी करण्यात येत होती.

त्यानुसार मुख्यमंत्री दालनात बैठक आयोजित करण्यात आली आहे. उद्या म्हणजे शुक्रवारी दुपारी 2:30 वाजता ही बैठक होईल. यासाठी महापालिका आयुक्त यांना माहिती देण्यासाठी बोलावण्यात आले आहे. त्यानुसार टॅक्स विभागाचे अधिकारी उपस्थित राहणार आहेत. मिळकत करासोबत पीएमपीच्या प्रश्नाबाबत देखील चर्चा होणार आहे. अशी माहिती प्रशासनाच्या वतीने देण्यात आली.

PMPML | पीएमपीएमएलची सेवा भविष्यात खंडित होऊ न देण्याचा पालकमंत्र्यांच्या बैठकीत निर्णय

Categories
Breaking News PMC Political social पुणे

पीएमपीएमएलची सेवा भविष्यात खंडित होऊ न देण्याचा पालकमंत्र्यांच्या बैठकीत निर्णय

पुणे | पुणे शहर सार्वजनिक वाहतूक व्यवस्थेतील प्रमुख असलेल्या पीएमपीएमएलची वाहतूक व्यवस्था भविष्यात खंडित होणार नाही याची पीएमपीएमएल प्रशासनाने दक्षता घ्यावी, असे निर्देश पालकमंत्री चंद्रकांतदादा पाटील यांनी दिले. (PMPML pune)

पीएमपीएमएलच्या चार ठेकेदारांकडून काही दिवसांपूर्वी पुकारलेल्या संपाच्या पार्श्वभूमीवर पालकमंत्री श्री. पाटील यांच्या निवासस्थानी शहर बससेवेबाबत पुणे व पिंपरी चिंचवड महानगरपालिका प्रशासन, पीएमपीएमएल प्रशासन आणि ठेकेदारांसमवेत बैठक घेण्यात आली.

या बैठकीला आमदार सिद्धार्थ शिरोळे, पीएमपीएमएलचे आयुक्त ओमप्रकाश बकोरिया, पुणे महापालिका आयुक्त विक्रम कुमार, पिंपरी-चिंचवडचे आयुक्त शेखर सिंह, पीएमआरडीएचे आयुक्त राहुल रंजन महिवाल, पालकमंत्र्यांचे विशेष कार्य अधिकारी राजेंद्र मुठे यांच्यासह पीएमपीएमएलचे प्रमुख ठेकेदार उपस्थित होते.

पुणे देशातील जलदगतीने विकसीत होणारे शहर असून, वास्तव्यासाठीदेखील सर्वाधिक पसंतीचे शहर आहे. त्यामुळे शहराची लोकसंख्या पाहता सार्वजनिक वाहतूक व्यवस्था पीएमपीएमएलवर अवलंबून आहे. सर्वाधिक पुणेकर पीएमपीएमएलच्या बसेसमधून प्रवास करतात.

पीएमपीएमएलच्या ठेकेदारांचे गेल्या तीन महिन्यांचे देयक न मिळाल्याने काही दिवसांपूर्वी पीएमपीएमएलच्या ठेकेदारांकडून अचानक संप पुकारण्यात आला होता. या संपाचा विद्यार्थी, नोकरदारांसह प्रवाशांना फटका बसला. त्यानंतर तातडीने पालकमंत्री श्री. पाटील यांनी मध्यस्थी करून तातडीने हा संप मिटवला. त्यावेळी पीएमपीएमएलकडून ठेकेदारांना ६६ कोटी रुपये देण्यात आले.

उर्वरित देयक आणि पुढील धोरण निश्चितीसाठी आजच्या बैठकीत चर्चा करण्यात आली. जानेवारी पर्यंतची तूट मार्च अखेरपर्यंत द्यावी, तसेच फेब्रुवारी आणि मार्चचे देयक १५ एप्रिलपर्यंत द्यावे अशा सूचना पालकमंत्री चंद्रकांतदादा पाटील यांनी पीएमपीएमएलच्या आयुक्तांना आयुक्त दिल्या.

भविष्यात पीएमपीएमएलकडून दर महिन्याला देयक अदा केले जाईल याची दक्षता घेण्याबाबत सूचना दिल्या. त्यावर पीएमपीएमएलच्या ठेकेदारांकडून समाधान व्यक्त करण्यात आले. प्रवाशांची गैरसोय होऊ नये यासाठी संबंधित सर्वांनीच संवेदनशीलता दाखवावी व बससेवा अखंडित आणि सुरळीत राहील याबाबत आवश्यक नियोजन करावे. प्रवाशांना चांगली सेवा मिळेल यासाठी आवश्यक उपाय करावेत, असे निर्देशही त्यांनी दिले.

MP Supriya Sule | पीएमपी बसचा बावधन येथील पेबल्स सोसायटीचा थांबा पूर्ववत सुरू करा | खासदार सुप्रिया सुळे

Categories
Breaking News Political social पुणे महाराष्ट्र

पीएमपी बसचा बावधन येथील पेबल्स सोसायटीचा थांबा पूर्ववत सुरू करा | खासदार सुप्रिया सुळे

पुणे : बावधन बुद्रुक येथील पेबल्स सोसायटीच्या समोर असलेला पीएमपी बसचा थांबा पूर्ववत सुर करण्यात यावा, अशी मागणी खासदार सुप्रिया सुळे यांनी केली आहे. स्थानिक नागरिकांच्या मागणीनुसार पीएमपी प्रशासनाला टॅग करत त्यांनी ही मागणी केली आहे.

कात्रज-देहूरोड बाह्यवळण महामार्गावरून निगडी, हिंजवडी आणि वडगाव मावळ कडे धावणाऱ्या पीएमपी बसेस पूर्वी बावधन येथील पेबल्स सोसायटीच्या गेटसमोर थांबत होत्या. त्यांच्यासाठी जुनी डीएसके टोयोटा शोरूम हा अधिकृत थांबा होता. तो थांबा अचानक बंद करण्यात आल्यामुळे येथील प्रवाशांची प्रचंड गैरसोय होत असून तो थांबा पूर्ववत सुरू करावा, अशी मागणी त्यांनी केली आहे.

निगडी, हिंजवडी आणि वडगाव मावळकडे जाणाऱ्या अनुक्रमे ४३, ४४ आणि २२८ या क्रमांकाच्या पीएमपीएमएलच्या बससाठी या थांब्यावर अनेक प्रवासी बसची वाट पहात थांबलेले असतात. अचानक तो बंद करण्यात आल्याने प्रवाशांना मागील किंवा पुढील बस थांब्यापर्यंत चालत जावे लागत आहे. ऐन कामाच्या वेळी हे चालत जाणे वेळखाऊ होते परिणामी कामावर किंवा शाळा महाविद्यालयात पोहोचण्यासाठी उशीर होणे आदी गोष्टींमुळे स्थानिक नागरिकांची प्रचंड गैरसोय होत असल्याचे खासदार सुळे यांनी म्हटले आहे.

हा थांबा पुर्ववत करण्यासाठी वारंवार पाठपुरावा करुनही त्याची योग्य दखल घेतली जात नाही. येथे स्टॉपचा बोर्ड लावण्यात आला नाही. नागरीकांना बससाठी किमान एक किलोमीटर अंतर चालून पुढच्या स्टॉपपर्यंत जावं लागतं. हा मार्ग आणि बस बाणेर, निगडी, चिंचवड आणि हिंजवडी येथे जाणारे प्रवासी आणि ज्येष्ठ नागरिकांसाठी अतिशय उपयोगी आहे.
नागरीकांची सोय लक्षात घेता वरील ठिकाणी सदर गाड्यांचा थांबा पुर्ववत करावा, असे सुळे यांनी आपल्या ट्विट मध्ये म्हटले आहे.

PMPML | NCP | पी.एम.पी.एम.एल ची सेवा पूर्ववत करण्यात यावी | राष्ट्रवादी काँग्रेस पार्टीची मागणी

Categories
Breaking News PMC पुणे

पी.एम.पी.एम.एल ची सेवा पूर्ववत करण्यात यावी | राष्ट्रवादी काँग्रेस पार्टीची मागणी

पी.एम.पी.एम.एल ला सेवा पुरविणाऱ्या ठेकेदारांनी पुकारलेल्या संपामुळे प्रवासी व विद्यार्थ्यांचे मोठ्या प्रमाणात हाल होत असून यावर तात्काळ तोडगा काढण्याची मागणी राष्ट्रवादी काँग्रेस पार्टीच्या शिष्टमंडळाने आज पी.एम.पी.एम.एल.चे व्यवस्थापक ओमप्रकाश बकोरिया यांना केली.

याबाबत शहर अध्यक्ष प्रशांत जगताप म्हणाले, “पुणे महानगर परिवहन महामंडळाच्या बसेसचे संचलन पुणे, पिंपरी चिंचवड शहरांमध्ये व जवळपासच्या ग्रामीण भागामध्ये मोठ्याप्रमाणात होत असते. त्यामुळे पुणे, पिंपरी चिंचवड शहर व जवळपासच्या ग्रामीण भागातील प्रवाशी नागरिकांची वाहतुकीची उत्तमरीत्या सोय होत असून, पुणे महानगर परिवहन महामंडळाच्या बस सेवेला पुणे, पिंपरी चिंचवड शहर व जवळपासच्या ग्रामीण भागाची रक्तवाहिनी म्हणून संबोधले जाते.

काल दिनांक ०५/०३/२०२३ रोजी दुपार पाळीनंतर भाडेतत्वावरील बसेसच्या ठेकेदारांनी अचानकपणे संप पुकारलेला आहे. त्यामुळे पुणे व पिंपरी चिंचवड तसेच जवळपासच्या ग्रामीण भागातील प्रवाशी नागरिक, विद्यार्थी, महिला पुरुष, ज्येष्ठ नागरिक यांची मोठ्या प्रमाणात गैरसोय झालेली आहे. तसेच १० वी व १२ वी च्या परीक्षा चालू असून या संपाची झळ विद्यार्थांना मोठ्या प्रमाणात बसलेली आहे. पर्यायाने परीक्षेला जाणे-येणेकरीता अडचणी निर्माण झालेल्या आहेत.

परिवहन महामंडळाच्या भाडेतत्वावरील बसेसच्या ठेकेदारांशी याबाबत तातडीने बैठक घेऊन बसेस कशा पध्दतीने पुर्ववत सुरू करता येतील, याकरीता निर्णय घेणे अत्यंत आवश्यक व गरजेचे आहे. भाडेतत्वावरील बसेसच्या ठेकेदारांशी सल्ला मसलत करून तातडीने निर्णय घेणे गरजेचे आहे. पुणे व पिंपरी चिंचवड तसेच जवळपासच्या ग्रामीण भागातील प्रवाशी नागरिक, विद्यार्थी, महिला पुरुष, ज्येष्ठ नागरिक यांची झालेली गैरसोय दूर करणेकरीता पुणे शहर राष्ट्रवादी काँग्रेस आपल्या पाठीशी खंबिरपणे उभी असून याकरीता सर्वतोपरी आपणास मदत करण्यास आम्ही तयार आहोत.

पुणे महानगर परिवहन महामंडळाच्या बसेस पुर्ववत सुरू करून पुणे व पिंपरी चिंचवड तसेच जवळपासच्या ग्रामीण भागातील प्रवाशी नागरिक, विद्यार्थी, महिला पुरुष, ज्येष्ठ नागरिकांची होणारी गैरसोय तातडीने दूर करावी, अशी मागणी शहराध्यक्ष प्रशांत जगताप यांनी निवेदनाद्वारे केली आहे.

यावेळी शहराध्यक्ष प्रशांत जगताप , प्रवक्ते प्रदीप देशमुख , संतोष नांगरे आदी उपस्थित होते.

 

PMPML | पीएमपीएमएल बसेस मधून विना तिकीट प्रवास करणाऱ्या प्रवाशांना 300 ऐवजी 500 रुपयाचा दंड | १० मार्च पासून होणार कार्यवाही.

Categories
Uncategorized

पीएमपीएमएल बसेस मधून विना तिकीट प्रवास करणाऱ्या प्रवाशांना 300 ऐवजी 500 रुपयाचा दंड 

| १० मार्च  पासून होणार कार्यवाही.

पुणे महानगर परिवहन महामंडळाच्या बस मधून विना तिकीट प्रवास करणाऱ्या प्रवाशांकडून मोटार वाहन कायदा १९८८ मधील कलम क्रमांक १७८ अन्वये दंडात्मक कारवाई करण्याच्या तरतुदीस अनुसरून रक्कम रु. ३००/- दंड वसूल करण्यात येतो. तसेच प्रवाशांनी कोणत्याही प्रकारच्या सवलतीच्या प्रवासी पासमध्ये खाडाखोड, दुरुपयोग अशा प्रकारे गैरप्रकारे जे प्रवासी पासचा गैरवापर करून प्रवास करताना आढळल्यास त्या प्रवाशांकडून रक्कम रु. ५००/- दंड वसूल करण्यात येतो.

 

​दिनांक १०/०३/२०२३ पासून विनातिकीट प्रवास करणाऱ्या प्रवाशांवर आळा व महामंडळाचे आर्थिक नुकसान होऊ नये याकरिता मोटार वाहन कायदा १९८८ मधील कलम क्रमांक १७८ अन्वये विनातिकीट प्रवास करणाऱ्या प्रवाशांना रक्कम रु. ३००/- ऐवजी रक्कम रु.५००/- इतका दंड आकारणी करण्यास संचालक मंडळाने दिनांक १६/०२/२०२३ रोजी मान्यता दिली असून विनातिकीट प्रवासी रक्कम रु.५००/-  दंड आकारणी दिनांक १०/०३/२०२३ पासून करण्यात येणार आहे.

| प्रत्येक महिन्याच्या ८ तारखेस पीएमपीएमएलच्या ‘तेजस्विनी’ बसमधून महिलांना मोफत बस प्रवास.

 

 

​जागतिक महिला दिनानिमित्ताने महिलांना मोफत प्रवास देण्याच्या मागणीच्या अनुषंगाने दि. ०६/०३/२०१९ रोजी मा. संचालक मंडळाच्या बैठकीमध्ये दर महिन्याच्या ८ तारखेस महिलांना तेजस्विनी बसमध्ये मोफत बस प्रवास करू देण्यास मान्यता दिलेली आहे. त्या अनुषंगाने परिवहन महामंडळामार्फत खास महिलांसाठी २३ मार्गावर २८ तेजस्विनी बसेस सुरू करण्यात आल्या होत्या तथापि, कोविड – १९ मुळे महिला प्रवाशांचा अल्प प्रतिसाद असल्याने सदरच्या बसेस बंद करण्यात आल्या होत्या.

​सध्या कोविड-१९ चा प्रादुर्भाव कमी झाल्याने व सर्व मार्गावर पूर्ण क्षमतेने बस संचलन सुरू करण्यात आल्याने महिला तेजस्विनी बसेस पूर्ण क्षमतेने सुरू करण्यात आलेल्या आहेत. सध्या प्रत्येक महिन्याच्या ८ तारखेस ‘तेजस्विनी’ बस मधून मोफत प्रवास सेवा हि दि. ८ मार्च २०२३ पासून पूर्ववत करण्यात येत आहे. जागतिक महिला दिनानिमित्त तेजस्विनी बसेस मधून महिलांनी मोफत प्रवास करण्याचे आवाहन पुणे महानगर परिवहन महामंडळाकडून करण्यात येत आहे.

 

PMPML | पीएमपीची ५ रुपयांत ५ किलोमीटर प्रवास योजना बंद| पीएमपी प्रशासनाचा निर्णय

Categories
Breaking News PMC पुणे

पीएमपीची ५ रुपयांत ५ किलोमीटर प्रवास योजना बंद

| पीएमपी प्रशासनाचा निर्णय

पुणे – शहर आणि पिंपरी चिंचवडमधील पीएमपीच्या डेपोपासून पाच किलोमीटरच्या अंतरासाठी ५ रुपये तिकिट आकारणी बंद झाली असून, त्या मार्गांवर नेहमीप्रमाणे तिकिट आकारणी होणार आहे. त्यामुळे टप्प्यानुसार प्रवाशांकडून पाच ते दहा रुपये तिकिट आकारण्यात येणार असल्याचे प्रशासनाने स्पष्ट केले आहे. हा बदल २८ मार्गांवर होणार आहे.

पीएमपीने २५ ऑक्टोबर २०२० पासून पाच किलोमीटर अंतरासाठी पाच रुपये तिकिट आकारणी सुरू केली होती. त्यासाठी ५६ मार्ग निश्चित करण्यात आले होते. परंतु, काही मार्गांवर प्रवाशांचा प्रतिसाद नसल्यामुळे ते बंद करून २८ मार्गांवर ही सेवा सुरू ठेवण्यात आली होती. परंतु, बस वाहतुकीसाठी येणारा खर्च आणि मिळणारे उत्पन्न यांचा विचार करता ५ किलोमीटर अंतरासाठी ५ रुपये तिकिट आकारणीमुळे पीएमपीने आर्थिक नुकसान होत होते. त्यातून संचलनातील तूटही वाढत होती. त्यामुळे या २८ मार्गांवर १९ फेब्रुवारीपासून नेहमीच्या दराने तिकिट आकारणी करण्याचा निर्णय पीएमपी प्रशासनाने घेतला आहे.

या मार्गांवर होणार नेहमीच्या दराने तिकिट आकारणी

स्वारगेट – पुणे स्टेशन- ताडीवाला रस्ता, पुलगेट ते शीतल पेट्रोल पंपनरवीर तानाजी वाडी – डेक्कन – गोखलेनगर, डेक्कन- नीलज्योतीकोथरूड – कोथरूड स्टॅंड ते कोथरूड स्टॅंड (वर्तुळाकृती मार्ग), गालिंदे पथ ते दांगट वस्ती, कर्वेनगर (गार्डन सिटी) ते कर्वेनगर (वर्तुळ)कात्रज – जांभुळवाडी, नह्रेगाव, गुजरवाडी, येवलेवाडी, वाघजाईनगरहडपसर – सासवड रोड रेल्वे स्टेशन, महंमदवाडी, फुरसुंगी, मांजरी, संकेतविहार, मांजरी बुद्रुकअप्पर डेपो – मार्केटयार्ड- शत्रुंजय मंदिर (वर्तुळ), कात्रज- कोंढवा रोड- अप्पर डेपोनिगडी – निगडी- रूपीनगर, खंडोबामाळ ते चिखलीभोसरी – भोसरी- दिघी, चऱ्होलीगाव- आळंदीपिंपरी – चिंचवडगाव – वाल्हेकरवाडीबालेवाडी – चिंचवडगाव – आकुर्डी रेल्वे स्टेशन

PMPML | Om Prakash Bakoria | शहराच्या विकासासाठी व वाहूतक सुधारण्यासाठी जलद बस वाहतूक आवश्यक | ओम प्रकाश बकोरिया

Categories
Breaking News social पुणे

शहराच्या विकासासाठी व वाहूतक सुधारण्यासाठी जलद बस वाहतूक आवश्यक | ओम प्रकाश बकोरिया

शहराच्या विकासासाठी आणि सार्वजनिक वाहूतक सुधारण्यासाठी बस रॅपिड ट्रान्झिट (जलद बस वाहतूक) आवश्यक आहे आणि ह्याच बी.आर.टी सक्षमीकरणासाठी आम्ही भर देणार आहोत. असे पुणे महानगर परिवहन महामंडळाचे अध्यक्ष व व्यवस्थापकीय संचालक ओम प्रकाश बकोरिया यांनी सांगितले. (PMPML CMD Om Prakash Bakoria)

पीएमपीएमएलकडून बी.आर.टी बाबत २ दिवसीय कार्यशाळा आयोजित करण्यात आली होती. या कार्यशाळेच्या समारोपाप्रसंगी ते बोलत होते. पुणे आणि पिंपरी-चिंचवड शहरामधील मधील बीआरटीचे नेटवर्क सुधारून त्यावर विविध उपाय योजना होण्यासाठी विद्यमान बी.आर.टी.एस नेटवर्क सुधारण्यासाठी आणि भविष्यातील विस्ताराची योजना ओळखण्यासाठी पीएमपीएमएलकडून ९ व १० फेब्रुवारी रोजी २ दिवसीय कार्यशाळा आयोजित करण्यात आली होती.

शहरातील एनजीओ परिसर, सेव्ह पुणे ट्रॅफिक मूव्हमेंट, सेंटर फॉर एन्व्हायर्नमेंट एज्युकेशन (सीईई), शहरी वाहतूक तज्ज्ञ प्रांजली देशपांडे आणि सर्ग डिझाइन स्टुडिओचे योगेश दांडेकर यांच्या तांत्रिक सहाय्याने घोले रोड येथील पंडित जवाहरलाल नेहरू सांस्कृतिक हॉलमध्ये कार्यशाळा आयोजित करण्यात आली होती. यावेळी परिसर संस्थेचे पदाधिकारी, पीएमपी प्रवासी मंचचे पदाधिकारी, वाहतूक तज्ञ,पीएमपीएमएल, पुणे व पिंपरी-चिंचवड मनपा, पुणे व पिंपरी चिंचवड वाहतूक विभागाचे अधिकारी/कर्मचारी उपस्थित
होते.

पुण्यातील बी.आर.टी कॉरिडॉर दररोज ४ लाखांहून अधिक प्रवाशांना सेवा देतो. बी.आर.टी नेटवर्कचा विस्तार केल्यास त्यात वाढ होऊ शकते असे मत सर्व उपस्थित तज्ञांकडून व्यक्त करण्यात आले. विद्यमान पिंपरी-चिंचवड कॉरिडॉरशी कनेक्टिव्हिटी सुनिश्चित करण्यासाठी काही कॉरिडॉर पूर्ण करणे आवश्यक आहे असे मत वाहतूक तज्ञांनी यावेळी व्यक्त केले. पुणे व पिंपरी –चिंचवड महानगरपालिकांकडून अपेक्षा याबाबत सहभागी तज्ञांनी सूचना केल्या.

Rotating washing’ centre | पीएमपीएमएलच्या फिटरने बनविले ‘फिरते वॉशिंग’ सेंटर

Categories
Breaking News social पुणे

पीएमपीएमएलच्या फिटरने बनविले ‘फिरते वॉशिंग’ सेंटर

|  बी.आर.टी. मार्गावरील अस्वच्छ बसथांबे स्वच्छ करण्यासाठी होणार वापर

| फिटर  बाबासाहेब मुलाणी यांच्या कडून ३ दिवसात निर्मिती.

| कमी वेळेत व कमी मनुष्यबळात बसथांबे होणार स्वच्छ.

बी.आर.टी. मार्गावरील अस्वच्छ बसथांबे पाण्याने धुवून स्वच्छ करणेसाठी पुणे महानगर परिवहन महामंडळाच्या पिंपरी आगारात कार्यरत असलेले बेंच फिटर बाबासाहेब मुलाणी यांनी कल्पना लढवून ‘फिरते वॉशिंग’ सेंटर तयार करून बी.आर.टी. बसथांबे स्वच्छ करणे सोपे केले असून त्यांचे सर्वत्र कौतुक होत आहे.

अनेक यांत्रिकी बाबींशी संलग्न काम करणारे कर्मचारी हे कल्पकता लढवून आपल्या परीने कामात सोपेपणा
आणण्यासाठी नावीन्यपूर्ण गोष्टी करत असतात. बी.आर.टी. मार्गावरील अस्वच्छ बसथांबे स्वच्छ करण्याच्या अडचणी दूर करण्यासाठी पिंपरी आगाराचे आगार व्यवस्थापक भास्कर दहातोंडे व पिंपरी आगार अभियंता राजकुमार माने यांच्या मार्गदर्शनाखाली बाबासाहेब मुलाणी यांनी १ एच.पी.ची मोटर, २ हजार लिटर पाण्याची टाकी व अन्य टाकाऊ साहित्या पासून सर्व्हिस व्हॅन मध्ये ‘फिरते वॉशिंग’ सेंटर तयार केले आहे.

एका बी.आर.टी. बसथांब्यावरून दुसऱ्या बसथांब्यावर जाऊन कमी वेळेत व कमी मनुष्यबळात बसथांबे पाण्याने धुवून स्वच्छ करणे शक्‍य होणार असल्याने ‘फिरते वॉशिंग’ सेंटर तयार करण्याबाबत आगार व्यवस्थापक  भास्कर दहातोंडे व आगार अभियंता  राजकुमार माने व  बाबासाहेब मुलाणी यांनी विचार केला, यासाठी पार्ट कोणतेवापरायचे ? त्याची रचना कशी करायची ? याचा अभ्यास करून त्यांनी एक डिझाईन तयार करून पार्ट्स बनवून घेतले व ते सर्व्हिस व्हॅन मध्ये जोडले. सिंगल फेज विजेवर चालणारी मोटार जोडून ३ दिवसांच्या प्रयत्नानंतर हे ‘फिरते वॉशिंग’ सेंटर तयार झाले आहे. एका बी.आर.टी. बसथांब्यावरून दुसऱ्या बसथांब्यावर जाऊन कमी वेळेत व कमी मनुष्यबळात बसथांबे पाण्याने धुवून स्वच्छ करणे सोयीस्कर झाले आहे. ‘फिरते वॉशिंग’ सेंटर तयार केल्याबद्दल आगार व्यवस्थापक  भास्कर दहातोंडे, आगार अभियंता राजकुमार माने व फिटर श्री. बाबासाहेब मुलाणी यांचे महामंडळाचे अध्यक्ष व
व्यवस्थापकीय संचालक ओम प्रकाश बकोरिया व सहव्यवस्थापकीय संचालक प्रज्ञा पोतदार – पवार यांनी कौतुक केले.